На мінулым тыдні свой старт узяла рэспубліканская акцыя “Моладзь за бяспеку”. Яна прысвечана дню заснавання Беларускай маладзёжнай грамадскай арганізацыі ратаўнікоў-пажарных. На працягу пяці дзён інспектар інспекцыі нагляду і прафілактыкі Глускага раённага аддзела па надзвычайных сітуацыях Віталь Маісеенка і два яго памочнікі з БРСМ (якія, дарэчы, з’яўляюцца таксама членамі маладзёжнай арганізацыі ратаўнікоў-пажарных) наведвалі дамы глушчан. Разам з арганізатарамі раённай акцыі давялося прысутнічаць на адным з рэйдаў у мінулую сераду. Мы пабывалі ў ветэрана Вялікай Айчыннай вайны, у пажылой жанчыны, што жыве адна, а таксама ў сем’ях з дзецьмі.
Перш-наперш праводзілася праверка пажарных апавяшчальнікаў і стан пячнога ацяплення. Так, у адным доме пячное ацяпленне патрабуе неадклад-нага рамонту. Акрамя таго, не ўсе гаспадары адносяцца ўважліва да замены элементаў сілкавання ў пажарных апавяшчальніках (у некаторых дамах яны былі ўвогуле зняты). Пасля інспекцыйнага агляду юныя ратаўнікі ўручалі інфармацыйныя буклеты, пажылым прапаноўвалі сваю дапамогу па гаспадарцы.
Не засталіся без увагі і дзеці: у іх пыталіся, ці ведаюць яны нумар пажарнай службы і свой адрас, а таксама, як сябе паводзіць пры пажары. Прыемным стала тое, што малыя ведаюць адказы на ўсе гэтыя пытанні. Сімвалічны падарунак знайшоўся і для дзяцей — кніжка-малышка па правілах пажарнай бяспекі.
Так праходзіў першы этап акцыі “Моладзь за бяспеку”. Як паведаміў нам Віталь Маісеенка, наперадзе яшчэ два этапы. Запланавана правесці сустрэчы-гутаркі з дзецьмі і іх бацькамі ў мясцовых установах адукацыі, а завяршэннем акцыі стане арганізацыя тэматычных конкурсаў, віктарын і раздача матэрыялаў нагляднай агітацыі ў грамадскіх месцах.
Лілія ХАРЛАНЧУК
Фота аўтара
