Для захавання традыцый
У чацвёртым Міжнародным форуме “Традыцыйная культура як стратэгічны рэсурс устойлівага развіцця грамадства”, які праходзіў на базе Магілёўскага абласнога метадычнага цэнтра народнай творчасці, прымалі ўдзел і прадстаўнікі Глускага раёна: фальклорнае вакальнае трыа “Ольніцкія бабулі” — Вера Балкіс, Кацярына Лісіца і Вольга Касько з Дуброўскага сельскага клуба і майстры Заеліцкага Дома рамёстваў — Соф’я Меснік, Наталля Грашчанка і Уладзімір Станкевіч. У выкананні трыа гучалі вясельна-абрадавыя песні, а заеліцкія майстры дэманстравалі свае работы — саламяныя дываны, купальскі пояс, бондарскія вырабы і вырабы з лазы.
Дзень, праведзены на форуме дэлегацыяй ад Глушчыны, якую ўзначальвала намеснік дырэктара цэнтралізаванай клубнай сістэмы Глускага раёна Вераніка Ермакова, быў багаты на хвалюючыя моманты і прыемныя падзеі. Адна з іх — узнагарода метадыста Заеліцкага Дома рамёстваў члена саюза майстроў Беларусі Наталлі Грашчанка (на здымку) сертыфікатам удзельніцы Рэспубліканскага свята “Купалле”, якое праходзіла ў Александрыі, — за стварэнне разам з 23 ткачыхамі вобласці купальскага пояса, на якім ёсць фрагмент арнамента нашай роднай Глушчыны.
Вольга ЧУЧВАЛ
Фота Анастасіі ПАЎЛАВАЙ