Жыхарка Оршы, якая пагналася за двума чамаданамі долараў, трапіла з сацыяльнай сеткі ў сетку махлярскую, паведамілі ў прэс-службе УУС Віцебскага аблвыканкама.
Выдатнае веданне англійскай мовы дамапагло пенсіянерцы пашырыць кола стасункаў у інтэрнэце. Аднойчы ў яе завязалася перапіска з грамадзянінам ЗША, які расказаў аршанцы сваю гісторыю, дастойную галівудскіх фільмаў. Быццам бы мужчына працаваў урачом у Сірыі, дзе па волі лёсу ў яго руках аказаліся два чамаданы з $10 млн. Гэтыя грошы віртуальны сябар прапанаваў перадаць жанчыне на захоўванне, растлумачыўшы гэта тым, што Беларусь — ціхая і спакойная краіна, а яго сяброўка па перапісцы — чалавек надзейны.
Чамаданы з грашыма павінен быў даставіць спецыяльны кур’ер. Але для гэтага на рахунак у банку далёкай афрыканскай дзяржавы Гана жыхарка Оршы павінна была пераслаць крыху наяўных грошай. У выніку даверлівая жанчына, каб аформіць неабходныя дакументы, сама залезла ў даўгі, але аддала Br170 млн.
Трывогу забілі сваякі пацярпелай. У пачатку лістапада пенсіянерка падала заяву ў Аршанскі РАУС. «Па гэтым факце была ўзбуджана крымінальная справа па арт. 209 ч. 4 (махлярства, учыненае ў асабліва буйным памеры). Праводзіцца праверка, але пералічаныя грошы ўжо даўно расталі на прасторах Сусветнай павуціны, спробы звязацца як з амерыканцам, так і з банкам Ганы дарэмныя. Гэта жорсткі ўрок, але хацелася б, каб ён быў на карысць астатнім даверлівым карыстальнікам сеткі», — падкрэслілі ў прэс-службе УУС аблвыканкама.
