Намеснік кіраўніка Адміністрацыі Прэзідэнта Беларусі Мікалай Снапкоў лічыць неабходным правядзенне ў краіне структурных пераўтварэнняў у эканоміцы з мэтай павышэння ўнутранай эфектыўнасці і канкурэнтаздольнасці. Аб гэтым ён заявіў сёння на канферэнцыі “Эканоміка Беларусі: зноў перад выбарам”, перадае карэспандэнт БЕЛТА.

“Для Беларусі краевугольным каменем паўстае пытанне павышэння ўнутранай эфектыўнасці і канкурэнтаздольнасці за кошт правядзення, перш за ўсё, структурных пераўтварэнняў і ўсеагульнага ўключэння ўсіх грамадзян краіны ў працэс стварэння нацыянальнага даходу”, — сказаў намеснік кіраўніка прэзідэнцкай Адміністрацыі.

Мікалай Снапкоў канстатаваў, што Беларусь, нават не маючы істотных запасаў нафты, аказалася залежнай ад сусветных цэн на гэту сыравіну. “Нягледзячы на адсутнасць запасаў нафты, на працягу апошніх 15 гадоў мы назіраем прамую залежнасць росту ВУП ад кошту нафты”, — сказаў ён.

Намеснік кіраўніка Адміністрацыі Прэзідэнта падкрэсліў неабходнасць выкарыстання стратэгіі інклюзіўнага росту ў працэсе эканамічнага развіцця Беларусі. “Пошук і ўкараненне стымулаў для бедных слаёў насельніцтва да павышэння ўласнага заработку можа стаць тым штуршком эканоміцы, якога так не хапае ва ўмовах, калі традыцыйныя механізмы не спрацоўваюць. Правільна выбудаваная сістэма індыкатараў для дзяржаўных служачых дасць магчымасць павысіць агульную эфектыўнасць кіравання эканомікай, а таксама створыць неабходную адзіную эканамічную ідэалогію”, — адзначыў Мікалай Снапкоў.

Паводле яго слоў, недастаткова ведаць толькі тое, што трэба рабіць у кантэксце правядзення рэформ, структурнага змянення грамадства і эканомікі. Неабходна таксама абавязкова ведаць, як і хто будзе гэта рабіць. “Калі б мы змаглі адказаць на гэта пытанне на нашым форуме, гэта было б добрай дапамогай ураду для таго, каб ён сфармуляваў дакладны зразумелы сістэмны план да правядзення сістэмных змяненняў у краіне”, — сказаў намеснік кіраўніка Адміністрацыі Прэзідэнта.

Мікалай Снапкоў лічыць, што выкарыстанне вертыкалі ўлады як аднаго з асноўных элементаў уладкавання грамадства на гэты момант не мае таго эфекту, які можна было б чакаць. “Прычына даволі простая. Яна заключаецца ў раз’яднанасці мэт, якую мы назіраем па вертыкалі выканаўчай улады. Раз’яднанасць мэт паміж урадам, міністэрствам, аблвыканкамам, раёнам, — канстатаваў ён. — Такім чынам, фарміруючы адзіную ідэю па ўсёй вертыкалі, мы былі б упэўнены, што гэта дасць істотны сінергетычны эфект як з пункту гледжання эфектыўнасці кіравання эканомікай у цэлым, так і ў прынцыпе будзе з’яўляцца адным з элементаў структурных пераўтварэнняў у краіне”.

“Адзіная эканамічная праграма, мэта, адзіная эканамічная ідэя з’яўляецца важным элементам, які ўрад павінен сфармуляваць, згенерыраваць, структураваць і прапанаваць для рэалізацыі ў будучым пяцігоддзі”, — сказаў Мікалай Снапкоў.

У інтэрв’ю журналістам пасля выступлення на адкрыцці форуму намеснік кіраўніка Адміністрацыі Прэзідэнта назваў дзве структурныя рэформы, якія неабходны для паспяховага развіцця эканомікі Беларусі: раздзяленне функцый дзяржавы як рэгулятара і як уласніка і фарміраванне дзяржаўнага індыкатыўнага прагназавання. “Першае: неабходна раздзяленне функцый дзяржавы як уласніка і рэгулятара. Гэта найпершая задача, якая дасць магчымасць стварыць зусім іншыя эканамічныя ўзаемасувязі ў краіне. Гэта не прыватызацыя — гэта раздзяленне функцый, адказнасці і напрамкаў дзейнасці міністэрстваў, канцэрнаў, аблвыканкамаў. Гэта з’яўляецца фундаментам. Пры невыкананні гэтага ўсё астатняе будзе з’яўляцца спробай”, — адзначыў Мікалай Снапкоў.

Другой рэформай, паводле яго слоў, павінна стаць фарміраванне дзяржаўнага індыкатыўнага прагназавання. “У гэты момант ажыццяўляць прагназаванне ў рамках дзяржавы складана. Ажыццяўляць планаванне неабходна ў холдынгах, прадпрыемствах, якія сапраўды могуць сфарміраваць план. План — гэта канкрэтна рух фінансавых патокаў, матэрыяльных затрат, гатовай прадукцыі па тых рэгіёнах продажаў, якія плануюцца ў сярэдзіне бягучага года, напрыклад, на наступны год або на наступны плюс два гады”, — растлумачыў Мікалай Снапкоў. На яго думку, дзяржава павінна стварыць умовы, неабходныя для выканання прагнозаў, для росту эканомікі.

“Гэта два змяненні, якія дапамогуць інакш сфарміраваць функцыянаванне ў эканамічным асяроддзі”, — рэзюмаваў намеснік кіраўніка Адміністрацыі Прэзідэнта.