Вахта памяці і кветкі
У Глуску адным з мерапрыемстваў, прысвечаных 98-й гадавіне Кастрычніцкай рэвалюцыі, стала ўскладанне кветак на Алеі Славы ў цэнтральным парку. Аддаючы даніну павагі пакаленням людзей, якія будавалі і абаранялі маладую незалежную савецкую краіну, зрабілі ўсё, каб мы зараз жылі ў міры і дабрабыце, старшыня раённага Савета дэпутатаў Андрэй Баброўнік, намеснік старшыні райвыканкама Людміла Клыга, члены раённага выканаўчага камітэта, кіраўнікі прадпрыемстваў і арганізацый Глуска, моладзь прынеслі да помнікаў землякам — Героям вайны і працы чырвоныя гваздзікі.
Падчас урачыстага ўскладання кветак прысутнічалі і піянеры — вучні першай школы райцэнтра. Са свайго дзяцінства мы памятаем вялікія кастрычніцкія парады з транспарантамі, партрэтамі савецкіх правадыроў, кветкамі і паветранымі шарыкамі… Хай і яны, сённяшнія піянеры, некалі ўспомняць, як стаялі на Вахце Памяці ў гонар значнай гістарычнай падзеі — Вялікай Кастрычніцкай сацыялістычнай рэвалюцыі 1917 года.