Граматы, кветкі і шчырая падзяка
Ганаровай граматай Глускага раённага выканаўчага камітэта ўзнагароджана намеснік старшыні райвыканкама Людміла Клыга — за плённую дзяржаўную і грамадскую дзейнасць, вялікі асабісты ўклад у развіццё і памнажэнне духоўнага патэнцыялу раёна. Вышэйшую ўзнагароду раёна Людміле Аляксандраўне ўручыў першы намеснік старшыні райвыканкама Аляксандр Гарбачэўскі. Пры гэтым ён зазначыў, што сацыяльная сфера — вельмі важная і адказная сфера нашага жыцця. Спраўляцца з такой работай і не проста быць у курсе праблем, а знаходзіць шляхі іх вырашэння Людміле Аляксандраўне дапамагалі і вопыт, і веды, і ўменне правільна арыентавацца ў сітуацыі, браць адказнасць на сябе, вызначаць мэту і ставіць дакладныя задачы. Таму да станоўчых эмоцый гэтага ўрачыстага моманту ўзнагароджання прымешваецца і пачуццё шкадавання, паколькі Людміла Клыга пакідае сваю работу на пасадзе намесніка старшыні райвыканкама.
На несумненнае ўменне Людмілы Аляксандраўны працаваць з людзьмі, знаходзіць разуменне як з высокімі дзяржаўнымі чыноўнікамі, так і з радавымі грамадзянамі — ветэранамі, школьнікамі, інтэлігенцыяй, рабочымі — звярнуў увагу і старшыня раённага Савета дэпутатаў Андрэй Баброўнік і ўручыў ёй Ганаровую грамату Глускага раённага Савета дэпутатаў — за актыўную жыццёвую пазіцыю, шматгадовую плённую дзяржаўную і грамадскую дзейнасць, вялікі асабісты ўклад у развіццё кіравання і самакіравання Глускага раёна. Добрым дапаўненнем да грамат сталі кветкі і адабральныя апладысменты прысутных — работнікаў аддзелаў і ўпраўленняў раённага выканаўчага камітэта. Вельмі прачулымі і нават кранальнымі былі словы, якія Людміла Клыга сказала ў адказ. Яна падкрэсліла, што з усяго мноства самых розных падзей, спраў, сустрэч і рабочых момантаў, якімі суправаджалася яе дзейнасць на пасадзе намесніка старшыні райвыканкама, зараз помніцца толькі ўсё добрае. Магчыма, таму, што добрага і сапраўды было больш. “Мне пашчасціла працаваць разам з цудоўнымі людзьмі, прафесіяналамі, якія не толькі ведаюць, але і любяць сваю справу, — сказала Людміла Аляксандраўна. — Я таксама любіла сваю справу. А гэта галоўнае на любой пасадзе, пры любой рабоце”.
Таццяна ЛУКАШЭВІЧ
Фота Сяргея РУДЗІНСКАГА