Аднолькавую колькасць гадзін на вывучэнне беларускай і рускай моў плануецца ўвесці ў Беларусі з другога класа
Аднолькавую колькасць гадзін на вывучэнне беларускай і рускай моў плануецца ўвесці ў школах Беларусі з другога класа. Першапачаткова такое новаўвядзенне будзе датычыцца толькі другакласнікаў, паведаміла 11 лютага журналістам галоўны спецыяліст упраўлення агульнай сярэдняй адукацыі Міністэрства адукацыі Ірына Булаўкіна.
“У нас з наступнага навучальнага года, пачынаючы з другога класа, незалежна ад мовы навучання будзе выдзелена аднолькавая колькасць гадзін на вывучэнне рускай і беларускай мовы і літаратуры”, – сказала Ірына Булаўкіна.
Паводле яе слоў, гэта новаўвядзенне будзе ўкараняцца паступова: спачатку ў другім класе, праз год – у другім-трэцім класах, праз два гады – у другім, трэцім і чацвёртым класах. “І гэтак мы паступова пяройдзем на вывучэнне беларускай мовы з аднолькавай колькасцю гадзін, як у класах з пятага па адзінаццаты”, – заўважыла галоўны спецыяліст.
Ірына Булаўкіна растлумачыла: для малодшых класаў размова ідзе пра тры гадзіны на мову і дзве – на літаратуру, а пры навучанні на павышаным узроўні ў дзясятым-адзінаццатым класах – пра тры гадзіны на мову і тры на літаратуру.