УП «Белтэхагляд» плануе ўвесці ў канцы лютага новы прэйскурант на паслугі па правядзенні дзяржаўнага тэхнічнага агляду на дыягнастычных станцыях. Такая інфармацыя размешчана на сайце прадпрыемства.
«У сярэднім кошт кантрольна-дыягнастычных работ будзе павялічаны на 18 працэнтаў. Гэта не закране станцыі, што не належаць прадпрыемству, і не паўплывае на памер дзяржаўнай пошліны. Пры гэтым паслугі «Белтэхагляду» па-ранейшаму будуць заставацца аднымі з самых нізкіх па кошце ў рэспубліцы — у сярэднім на 11 працэнтаў ніжэй за агульнарэспубліканскі ўзровень», — гаворыцца ў паведамленні.
На прадпрыемстве растлумачылі, што перагляд тарыфаў звязаны з неабходнасцю прывядзення іх узроўню да эканамічна абгрунтаваных і з улікам такіх фактараў, як інфляцыйныя працэсы ў 2014-2016 гадах, рост абавязковых плацяжоў, кошт энергарэсурсаў. Пад увагу таксама прыняты сацыяльны складнік і агульны ўзровень плацежаздольнага попыту.
У паведамленні адзначаецца, што аўтаўладальнікі, якія плануюць у бліжэйшы час наведаць станцыі дыягностыкі УП «Белтэхагляд», маюць магчымасць прайсці дзяржтэхагляд па ранейшых тарыфах. Прайсці яго можна на любой дыягнастычнай станцыі незалежна ад месца рэгістрацыі транспартнага сродку.
Цяпер цэнаўтварэнне ў сферы дзяржтэхагляду ў Беларусі свабоднае і фарміруецца ўладальнікамі дыягнастычных станцый самастойна, зыходзячы з кан’юнктуры рынку. З 230 існуючых у рэспубліцы станцый толькі 21 знаходзіцца ў веданні УП «Белтэхагляд», уключаючы 9 мабільных, што размяшчаюцца ў аддаленых раёнах для забеспячэння зручнасці аўтаўладальнікаў.
Апошні раз тарыфы на тэхагляд у Беларусі пераглядаліся ў верасні 2014 года.
