Гуляем Масленіцу!
На шырокую Масленіцу запрашаюць усіх глушчан і жыхароў раёна работнікі культуры, гандлю і спартсмены. У суботу, 12 сакавіка, на шосты дзень масленічнага тыдня, у 11 гадзін, раённы Дом культуры каля кінатэатра “Арыён” наладзіць тэатралізаванае прадстаўленне “Прывітанне, Масленіца!”. Тут жа прапануюць усім жадаючым спаборніцтвы — хто зможа залезці на слуп або будзе больш удачлівым на імправізаванай рыбалцы. Дарэчы, прызы даволі важкія — амаль па мяху бульбы, зерня, шампанскае, плеценыя кошыкі… Канешне ж, нельга абысціся і без народнай забавы — перацягвання каната, гэта, як і заўсёды, арганізуе аддзел адукацыі, спорту і турызму, а памерацца сіламі запрошаны каманды мясцовых прадпрыемстваў і арганізацый.
Само сабою, не абыдзецца без бліноў, іх напякуць жанчыны аматарскага аб’яднання “Гаспадынька”, што дзейнічае пры РДК. Канешне, і другога харчу будзе хапаць, ды не толькі пад’есці на месцы, але і дадому прыкупіць. Удзел у кірмашы, які пачнецца а 9-й гадзіне, ужо пацвердзілі Бабруйскі завод алеяў, Бабруйскі мясакамбінат, глускі лясгас (можна будзе прыкупіць да блінцоў мёду), Веснаўскі дом-інтэрнат, кандытарскія і кулінарныя вырабы прапануе Глускае райпо. Знойдзецца што і для тых, хто прыйдзе па агародніну або рыбу. Будуць у продажы і ручныя вырабы ад майстроў Заеліцкага Дома рамёстваў.
Завершыцца масленічнае гулянне вясёлай дыскатэкай тут жа, каля “Арыёна”. Так што не плануйце на суботу розныя сур’ёзныя справы, а прыходзьце адпачыць, паспытаць прысмакаў, знаёмых пабачыць ды сябе паказаць!
А. ВАСІЛЕЎСКАЯ