Урачыстая цырымонія па ўручэнні пашпартоў у межах рэспубліканскай акцыі БРСМ «Мы — грамадзяне Беларусі!» адбылася 15 сакавіка ў Магілёўскім абласным мастацкім музеі імя Паўла Масленікава. Прыемна адзначыць, што сярод 30 прадстаўнікоў таленавітай моладзі рэгіёна там была і наша юная зямлячка, вучаніца 8-га класа гімназіі Наталля Дзяшчэня. Па-першае, яна выдатніца вучобы, у мінулым годзе стала прызёрам абласнога этапа прадметнай алімпіяды па абслугоўваючай працы, удзельнічала ў II Міжнародным конкурсе юных чытальнікаў «Жывая класіка». Па-другое, ужо ў гэтым навучальным годзе Наташа палепшыла свой вынік і на абласной прадметнай алімпіядзе заняла другое месца.
Ці трэба казаць, якое прыемнае хваляванне і гонар адчувала дзяўчына, атрымліваючы пашпарт з рук старшыні Магілёўскага абласнога Савета дэпутатаў Анатоля Ісачанкі, і потым, калі ў ліку іншых юнакоў і дзяўчат прымала віншаванні ад ганаровых гасцей свята — ветэранаў Вялікай Айчыннай вайны.
Т. ЛУКАШЭВІЧ
