Міністэрства працы і сацыяльнай абароны растлумачыла парадак разліку заработнай платы работнікаў, грашовага забеспячэння, дапамог і іншых выплат у сувязі з правядзеннем дэнамінацыі афіцыйнай грашовай адзінкі Беларусі. Такая інфармацыя размешчана на сайце ведамства.
З 1 ліпеня 2016 года выплаты, устаноўленыя нарматыўнымі прававымі актамі, у тым ліку лакальнымі, у абсалютных (лічбавых) памерах, падлягаюць змяншэнню ў 10 000 разоў.
Акругленне зменшаных памераў базавых выплат ажыццяўляецца з улікам двух знакаў пасля коскі да найменшага наміналу грашовага знака (з 1 ліпеня 2016 года — 1 капейка) узору 2009 года, які знаходзіцца ў абарачэнні на тэрыторыі рэспублікі. Пры гэтым калі першая з лічбаў, што адкідаюцца (трэцяя лічба пасля коскі), большая або роўная 5, то апошняя з захоўваемых лічбаў (другая лічба пасля коскі) павялічваецца на адзінку, а калі першая з лічбаў, што адкідаюцца (трэцяя лічба пасля коскі), меншая за 5, то павелічэнне не праводзіцца (адкідаюцца лічбы пасля коскі, пачынаючы з трэцяй).
Вылічэнне памеру заработнай платы работнікаў, грашовага забеспячэння ваеннаслужачых, супрацоўнікаў, якія маюць спецыяльныя званні, сувораўцаў, выхаванцаў воінскіх часцей, аднаразовых выплат, пенсій праводзіцца ў парадку, устаноўленым заканадаўствам.
Кожны разлічаны элемент (павышэнні, надбаўкі, даплаты, прэміі і інш.) заработнай платы, пенсіі, дабавачны від грашовага забеспячэння, аднаразовая выплата падлягаюць указанаму акругленню.
Аналагічна ажыццяўляецца акругленне заработнай платы работнікаў іншых арганізацый, устаноў, дзяржаўных органаў, а таксама грашовага забеспячэння ваеннаслужачых.
Пры вылічэнні (пераразліку) памераў дапамог сем’ям, якія выхоўваюць дзяцей, дапамог па часовай непрацаздольнасці і дапамог на пахаванне з 1 ліпеня 2016 года велічыні сярэднямесячнай заработнай платы работнікаў у рэспубліцы за квартал, бюджэту пражытачнага мінімуму ў сярэднім на душу насельніцтва і сярэдняй заработнай платы работнікаў у рэспубліцы за перыяды да 1 ліпеня 2016 года падлягаюць змяншэнню ў 10 000 разоў і акругленню.
Пры вылічэнні (пераразліку) дапамог па часовай непрацаздольнасці і па цяжарнасці і родах з 1 ліпеня 2016 года сумы заработнай платы, прэмій і іншых выплат (даходу, узнагароджання) за кожны месяц перыяду (перыяд), за які вызначаецца памер сярэднядзённага заработку (даходу, узнагароджання), да правядзення дэнамінацыі, падлягаюць змяншэнню ў 10 000 разоў да двух знакаў пасля коскі.
Дэнамінацыя афіцыйнай грашовай адзінкі праводзіцца згодна з указам ад 4 лістапада 2015 года нумар 450 «Аб правядзенні дэнамінацыі афіцыйнай грашовай адзінкі Рэспублікі Беларусь» шляхам замены грашовых знакаў узору 2000 года на грашовыя знакі ўзору 2009 года ў суадносінах 10 000 беларускіх рублёў у грашовых знаках узору 2000 года да 1 беларускага рубля ў грашовых знаках узору 2009 года.
