Глушчан убачыць Магілёў
Глускі раён 6 красавіка прыме эстафету абласнога праекта “Фестываль народных талентаў Магілёўшчыны” ад Быхаўскага раёна. Са сваёй прэзентацыяй глушчане адправяцца ў Магілёў праз тыдзень, 14 красавіка. Творчыя набыткі нашага раёна, паведаміла дырэктар цэнтралізаванай клубнай сістэмы Вольга Огур, прадставяць народныя вакальныя ансамблі “Крынічанька” раённага Дома культуры, “Вярбічанька” Клетненскага і “Азярынка” Калаціцкага сельскіх Дамоў культуры. Далучацца да іх ансамбль “Беларусачка” Заеліцкага сельскага цэнтра культуры і вольнага часу, а таксама салісты РДК. Аўтэнтычную спадчыну раёна прэзентуе фальклорнае трыа “Ольніца” (Дуброўскі сельскі клуб). Таксама ўдзел у фестывалі прыме Глуская цэнтральная бібліятэка.
Зямля наша слаўная не толькі песеннымі традыцыямі, але і старадаўнімі рамёствамі, і таму да фестывалю народных талентаў рыхтуецца выстава вырабаў метадыстаў-майстроў Заеліцкага Дома рамёстваў. Лазапляценне, карункапляценне, інкрустацыя саломкай, бондарства годна прадставяць Глушчыну як край людзей працавітых і творчых.