У Беларусі ў мінулым годзе натуральны прырост насельніцтва зафіксаваны ў 83 гарадах і 24 пасёлках гарадскога тыпу (у 2010-м – у 51 і 17 адпаведна), паведаміла на прэс-канферэнцыі намеснік старшыні Нацыянальнага статыстычнага камітэта Жанна Васілеўская.

Натуральны прырост сельскага насельніцтва адзначаны ў мінулым годзе ў Мінскім, Брэсцкім і Мазырскім раёнах.

Прадстаўнік Белстата канстатавала, што апошнія гады ў рэспубліцы адзначаецца рост колькасці насельніцтва. За 2015-ы колькасць жыхароў краіны павялічылася на 17,5 тыс. і на 1 студзеня 2016 года склала 9 млн 498 тыс.

Самым шматлікім рэгіёнам рэспублікі з’яўляецца сталіца: у Мінску пражывае амаль 1 млн 960 тыс. чалавек, або кожны пяты жыхар краіны. З абласцей найбольшая колькасць жыхароў сканцэнтравана ў Гомельскай вобласці – 1 млн 423 тыс., або амаль кожны сёмы жыхар краіны. Як і папярэднія гады, самымі нешматлікімі з’яўляюцца Магілёўская і Гродзенская вобласці. У кожнай з іх жыве крыху больш за 11 працэнтаў ад агульнай колькасці насельніцтва рэспублікі.

Вызначальным фактарам павелічэння колькасці насельніцтва Беларусі ў 2015 годзе стаў міграцыйны прырост, які склаў 18,5 тыс. чалавек і кампенсаваў натуральныя страты.

Натуральнае змяншэнне насельніцтва за 2015 год склала 998 чалавек. У параўнанні з 2014-м яно скарацілася ў 3 разы, а ў параўнанні з 2010-м – у 29 разоў. Зніжэнне натуральнага змяншэння назіралася практычна ва ўсіх абласцях рэспублікі: Віцебскай, Гомельскай, Гродзенскай, Мінскай і Магілёўскай. Як і ў 2014 годзе, натуральны прырост насельніцтва адзначаны ў Мінску і Брэсцкай вобласці (5 тыс. 528 і 1 тыс. 136 чалавек адпаведна).