У першыя дні красавіка надвор’е пагоршыцца, чакаюцца ападкі і парывісты вецер, паведаміла галоўны сіноптык Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Святлана Рыбакова.

“Сакавік развітваецца з намі па-веснавому цёплым надвор’ем, і, нягледзячы на пахаладанне ў другой палавіне месяца, у цэлым ён выдаўся цёплым, сярэдняя тэмпература паветра была на 3-4 градусы вышэйшай за кліматычную норму. Але ў першыя дні красавіка надвор’е пагоршыцца, віной таму стануць актыўныя атмасферныя франты, якія будуць заўтра днём перамяшчацца праз паўднёвыя раёны краіны”, – растлумачыла сіноптык.

У пятніцу, 1 красавіка, ноччу месцамі, у асноўным па паўднёвым захадзе Беларусі, пройдуць невялікія дажджы. Днём на большай частцы тэрыторыі таксама чакаюцца дажджы, па паўночным захадзе – з мокрым снегам, месцамі па паўднёва-ўсходняй палавіне краіны – моцныя дажджы, магчымы навальніцы. У начны і ранішні час у асобных раёнах прагназуецца слабы туман. Тэмпература паветра ноччу складзе ад мінус 1 да плюс 5, днём будзе 4-9 градусаў цяпла, па паўднёвым усходзе – 10-12 вышэй за нуль.

У суботу, 2 красавіка, ноччу тэрыторыя Беларусі застанецца пад уплывам франтальных раздзелаў, таму на большай частцы краіны чакаюцца ападкі ў выглядзе мокрага снегу і дажджу, месцамі моцныя ападкі. Днём надвор’е будуць фарміраваць няўстойлівыя паветраныя масы, якія паступаюць з паўночнага захаду Еўропы. З ростам атмасфернага ціску ападкаў стане менш, пройдуць яны пераважна па ўсходняй палавіне краіны і будуць мець кароткачасовы характар. Ноччу і раніцай на асобных участках дарог магчыма галалёдзіца. Дыскамфорту дабавіць моцны парывісты вецер. Ноччу месцамі, раніцай і днём у многіх раёнах вецер узмоцніцца з парывамі да 15-20 м/с. Тэмпература паветра ноччу складзе ад мінус 2 да плюс 3, днём чакаецца 3-8 градусаў цяпла, па паўднёвым захадзе да плюс 10.

“Але ўжо 3 красавіка краіна апынецца ў вобласці павышанага атмасфернага ціску, надвор’е палепшыцца, выгляне сонца, сціхне вецер, будзе пераважна без ападкаў”, – адзначыла Святлана Рыбакова. Ноччу і раніцай на асобных участках дарог чакаецца галалёдзіца. Тэмпература паветра ноччу складзе ад мінус 5 да плюс 1, днём будзе 5-10 градусаў цяпла, па паўднёвым захадзе паветра прагрэецца да 11-14 градусаў вышэй за нуль.

У пачатку наступнага тыдня надвор’е будзе фарміраваць вобласць павышанага атмасфернага ціску, у паўднёва-заходніх раёнах краіны адаб’ецца ўплыў больш цёплых паветраных мас, якія паступаюць з Заходняй Еўропы.