Юныя піяністы
Насычанымі і напружанымі выдаліся другая і трэцяя чвэрці для вучаніц фартэпіяннага аддзялення дзіцячай школы мастацтваў Яўгеніі Каранец і Марыі Савончык. Юныя піяністкі прынялі ўдзел у некалькіх конкурсах, з кожнага яны вярталіся з заслужанымі ўзнагародамі, станоўчымі эмоцыямі і новым вопытам.
Найперш трэба сказаць пра II адкрыты фестываль-конкурс юных піяністаў “Натхненне”, які праходзіў у Клічаўскім раёне. Яўгенія Каранец (настаўнік Наталля Яўгенаўна Кузьміна) у малодшай групе, дзе выступалі 27 канкурсантаў, заняла 3-е месца, а Марыя Савончык (настаўнік Таццяна Мікалаеўна Макарэвіч) прывезла дыплом удзельніка. Потым нашы юныя піяністкі выступалі на адкрытым фестывалі-конкурсе “Беларускія карцінкі —2016”. У Любані, дзе праходзіў гэты конкурс, Жэня Каранец атрымала грамату ўдзельніка, спецыяльнага дыплома за лепшае выкананне твора беларускага кампазітара была ўдастоена Марыя Савончык. Дыпломы ўдзельнікаў конкурсу абедзве нашы юныя піяністкі прывезлі яшчэ і з Клецка.
Але найбольш важным і, бадай, найбольш адказным і прэстыжным стаў для іх I адкрыты конкурс юных піяністаў імя Уладзіміра Алоўнікава, які праходзіў у Бабруйску. Нягледзячы на тое, што конкурс з’яўляецца рэгіянальным, у ім бралі ўдзел музыканты не толькі з Магілёўшчыны, але і з Гродна, Гомеля, Віцебска, усяго больш за 140 чалавек. Хвалявання не пазбегнуць на любым конкурсе, а тут старшынёй журы быў народны артыст Рэспублікі Беларусь Ігар Алоўнікаў — сын знакамітага кампазітара, дарэчы, ураджэнца горада Бабруйска, і гэта яшчэ больш павышала і важкасць конкурсу, і ступень адказнасці юных выканаўцаў. Затое як радасна і як прыемна было нашым канкурсанткам, калі іх выступленні былі адзначаны і ацэнены строгім і прафесійным журы, а той факт, што заслужаныя ўзнагароды ім уручыў Ігар Алоўнікаў, яшчэ больш павысіў іх каштоўнасць і для дзяўчынак, і для настаўнікаў. Грамату ўдзельніка атрымала Яўгенія Каранец, Марыя Савончык удастоена дыплома за артыстызм — у яе ўзроставай групе з больш як 60 удзельнікаў дыпломамі і граматамі былі адзначаны 20 юных выканаўцаў.
— Узровень маладых музыкантаў на беларускіх фартэпіянных конкурсах вельмі высокі, — расказвае намеснік дырэктара па вучэбна-выхаваўчай рабоце Глускай дзіцячай школы мастацтваў Наталля Кузьміна, — таму падрыхтоўка праграм патрабавала ад юных піяністак вялікай самааддачы, вытрымкі і карпатлівай работы за інструментам. Пры падборы ім рэпертуару мы ўлічвалі і тое, што на сучасных конкурсах асаблівая ўвага надаецца творам беларускіх кампазітараў. Увогуле трэба адзначыць, што музычныя конкурсы для дзяцей — гэта цудоўны спосаб іх матывацыі да навучання. Атмасфера творчага саперніцтва выклікае ў іх азарт, вучыць спраўляцца з эмоцыямі, валодаць сабой, каб у патрэбны момант сканцэнтравацца, прадэманстраваць тэхніку і артыстызм. Разам з гэтым удзел у конкурсах стымулюе юных музыкантаў да таго, каб павышаць сваё майстэрства ў валоданні інструментам.
Наталля Кузьміна расказала таксама, што ў сакавіку ў Жлобіне праводзіўся музычны конкурс “Рускі партрэт у беларускім інтэр’еры”, ён праходзіць адзін раз у два гады. Сяголета ў ім прыняў удзел і васьмігадовы піяніст з Глуска Толя Сухарукаў. Хлопчык толькі першы год вучыцца ігры на фартэпіяна (клас настаўніцы Вольгі Васільеўны Хацько), але вынікі ўжо відавочныя: на гэтым конкурсе ён атрымаў грамату за паспяховае выступленне. Калі Толя і далей будзе старанна займацца, будзе цярплівым і настойлівым, то новыя конкурсы прынясуць у яго музычнае жыццё і новыя, яшчэ больш важкія ўзнагароды.
Т. ЛУГАВАЯ
Фота С. РУДЗІНСКАГА