Права пасажыра таксі адмовіць у аплаце пры адсутнасці чэка заканадаўча замацуюць у Беларусі
Дэпутаты Палаты прадстаўнікоў 16 чэрвеня на пасяджэнні прынялі ў першым чытанні папраўкі ў закон «Аб аўтамабільным транспарце і аўтамабільных перавозках».
Як адзначыў міністр транспарту і камунікацый Анатоль Сівак, прадугледжваюцца значныя змяненні ў галіне перавозак пасажыраў аўтамабілямі таксі. Так, уведзена падрабязная рэгламентацыя адносін паміж заказчыкам перавозак, аператарамі таксі, дыспетчарамі і перавозчыкамі. «Артыкул 28 закона дапоўнены правам пасажыра адмовіцца ад аплаты за праезд у аўтамабілі таксі ў выпадку неатрымання ад вадзіцеля чэка, фарміруемага таксометрам», — расказаў міністр.
У цэлым, паводле слоў Анатоля Сівака, дакументам прапануецца сфарміраваць празрыстую сістэму арганізацыі аўтамабільных перавозак, якая заснавана на эфектыўным узаемадзеянні суб’ектаў гаспадарання і ўпаўнаважаных дзяржорганаў. Так, дакладна размяжоўваюцца паняцці «аўтамабільныя перавозкі пасажыраў у рэгулярных зносінах» і «аўтамабільныя перавозкі пасажыраў у нерэгулярных зносінах».
У законапраекце таксама канкрэтызавана, што транспартнымі дакументамі пры выкананні перавозак грузаў з’яўляюцца: пры выкананні ўнутрырэспубліканскіх аўтаперавозак — таварна-транспартная накладная, пры выкананні міжнародных аўтаперавозак — міжнародная таварна-транспартная накладная (CMR).
Акрамя таго, артыкул 41 дзеючага закона плануецца дапоўніць палажэннямі, у адпаведнасці з якімі грузаадпраўшчык абавязаны забяспечыць прадастаўленне аўтаперавозчыку грузасуправаджальных дакументаў, аформленых належным чынам, і нясе адказнасць за непрадастаўленне іх у поўным аб’ёме.
