Майстар — клас!
Аляксей Меснік, метадыст Заеліцкага дома рамёстваў, заняў 3-е месца на свяце-конкурсе майстроў лазапляцення “Лазовы прут —2016”, што праходзіў падчас міжнароднага фестывалю мастацтваў “Славянскі базар”.
Увогуле, у складзе дэлегацыі ад Магілёўскай вобласці было два майстры лазапляцення, Аляксей Меснік і Таццяна Фяськова з Магі-лёва, якую сам Аляксей Сяргеевіч лічыць сваёй настаўніцай у рамястве, а таксама Мікіта Меснік — ужо вучань самога Аляксея. Яны прадстаўлялі сваё майстэрства ў намінацыі “дэкаратыўны выраб”, дзе ўдзельнічала больш за 30 рамеснікаў з Беларусі, Літвы, Латвіі, Украіны і Расіі. Конкурс праходзіў у два этапы: майстрам трэба было загадзя падрыхтаваць выставу сваіх вырабаў, а непасрэдна ў фестывальныя дні зрабіць яшчэ адзін. Аляксей Меснік прадстаўляў сплеценыя з лазы напольныя вазы, а Мікіта дапамагаў, робячы “вецяркі” і “камышыкі” — яны, пастаўленыя ў гэтыя вазы, вельмі добра дапаўнялі іх і надавалі закончаны выгляд вырабам. Ваза, што была створана за два дні конкурсу, атрымалася немалая — метр вышынёй і сантыметраў 30 у дыяметры.
У выніку заеліцкія майстры заслужылі: Аляксей Меснік — дыплом 3-й ступені, яго вучань і памочнік Мікіта — дыплом за актыўны ўдзел.
“На самой справе, месцы, дыпломы — гэта другаснае, — падзяліўся з намі ўражаннямі Аляксей Сяргеевіч. — На першым месцы — зносіны з іншымі рамеснікамі, перайманне вопыту. Падчас такіх святаў, конкурсаў ты на свае вочы бачыш работы другіх майстроў, разумееш, да якога ўзроўню яшчэ трэба імкнуцца, цікавішся нейкімі напрацоўкамі і сакрэтамі”.
Насамрэч, член саюза майстроў Беларусі Аляксей Меснік і сам валодае сакрэтамі лазапляцення не горш за іншых. Гэта пацвярджае і апошні атрыманы дыплом (апошні, але далёка не першы), і тое, што напрыканцы мінулага года Аляксей Меснік быў запрошаны ў саставе беларускай дэлегацыі на Дні культуры Беларусі ў Туркменістане. Разам з іншымі майстрамі ён прадстаўляў дэкаратыўна-прыкладное мастацтва нашай рэспублікі, праводзіў майстар-класы для наведвальнікаў мерапрыемства ў Ашхабадзе і Туркменабадзе. Народныя вырабы выклікаюць цікавасць і прымушаюць спыніцца і нас, беларусаў, то ўявіце, як зацікавілі рэчы з лазы туркменаў, для якіх гэтая самая лаза — сапраўдная экзотыка. Аляксей Сяргеевіч, успамінаючы тыя 13 дзён, праведзеных у далёкай краіне, узгадвае і такі факт: некаторыя з наведвальнікаў выставы, паказваючы на лазу, пыталіся, ці гэта салома. Вось так майстар з Заеліцы Аляксей Меснік знаёміў туркменаў з беларускім народным рамяством, а значыць, крышачку і з самой Беларуссю.
Аксана ВАСІЛЕЎСКАЯ
Фота Ірыны ГРАМЫКІ