Туман і кароткачасовыя дажджы чакаюцца ў Беларусі ў выхадныя, паведаміла галоўны сіноптык службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Святлана Рыбакова.

“22 верасня – дзень асенняга раўнадзенства, афіцыйны пачатак восені ў Паўночным паўшар’і. Дзень і ноч у гэты дзень прыкладна роўныя – прадоўжацца каля 12 гадзін. У Беларусь на гэтым тыдні таксама прыйшло сапраўднае асенняе надвор’е: нізкае неба зацягнулі хмары, пайшлі дажджы, падзьмуў паўночны вецер.Тэмпература паветра панізілася і ўжо ў асноўным на 1-4 градусы ніжэйшая за кліматычную норму. Цяпер надвор’е цалкам адпавядае кастрычніцкаму”, – растлумачыла сіноптык.

22 верасня на тэрыторыю Беларусі прадоўжылі паступаць халодныя няўстойлівыя паветраныя масы. У пятніцу, 23 верасня, захаваецца халаднаватае надвор’е. Дажджы пройдуць пераважна па ўсходняй частцы краіны, аднак удзень месцамі па Брэсцкай і Гродзенскай абласцях таксама магчымы кароткачасовыя дажджы. Тэмпература паветра ноччу складзе 3-8 градусаў вышэй за нуль, днём будзе ўсяго 8-14 градусаў цяпла, толькі па паўднёвым захадзе тэмпература павысіцца да плюс 16.

У гэтыя выхадныя надвор’е на тэрыторыі краіны будуць вызначаць няўстойлівыя халаднаватыя паветраныя масы, што паступаюць з Балтыйскага мора. У суботу і нядзелю месцамі пройдуць кароткачасовыя дажджы. Уначы і раніцай у асобных раёнах згусціцца туман. Тэмпература паветра ноччу будзе складаць 3-9 градусаў вышэй за нуль, днём паветра пачне прагравацца да 10-17 градусаў цяпла.

“У пачатку наступнага тыдня тэрыторыя Беларусі апынецца пад уплывам антыцыклону, сфарміраванага ў халаднаватым паветры. Таму надвор’е палепшыцца, будзе пераважна без ападкаў, але на цяпло разлічваць асабліва не даводзіцца”, – падкрэсліла Святлана Рыбакова. Уначы і раніцай у асобных раёнах чакаецца туман. Тэмпература паветра 26 верасня ноччу складзе 3-8 градусаў вышэй за нуль, днём чакаецца 10-16 градусаў цяпла. У аўторак, 27 верасня, начная тэмпература панізіцца да 2-7 градусаў цяпла, на глебе месцамі магчымы замаразкі да нуля – мінус 2, дзённыя тэмпературы будуць знаходзіцца ў межах 10-17 градусаў вышэй за нуль.