Чарговае пасяджэнне раённай камісіі па надзвычайных сітуацыях прайшло 2 лістапада пад старшынствам Аляксандра Анцюшэні, намесніка старшыні райвыканкама па пытаннях будаўніцтва. У сувязі з тым, што ў некаторых мясцовых установах і арганізацыях працуюць новыя кіраўнікі, у склад камісіі былі ўнесены адпаведныя змены. У прыватнасці, намеснікам старшыні раённай камісіі па ліквідацыі надзвычайных сітуацый стаў Андрэй Камінскі, начальнік раённага аддзела па надзвычайных сітуацыях, працуе на гэтай пасадзе з 25 ліпеня 2016 года.
Асноўная ўвага на гэтым пасяджэнні была ўдзелена падрыхтоўцы органаў кіравання, сіл і сродкаў Глускага раённага звяна Магілёўскай тэрытарыяльнай падсістэмы дзяржаўнай сістэмы ліквідацыі надзвычайных сітуацый да рэагавання на надзвычайныя сітуацыі ў асенне-зімовы перыяд. Інакш кажучы, гаворка ішла пра тое, як раённыя службы, што забяспечваюць нармальную жыццядзейнасць насельніцтва і работу прамысловых і сацыяльных аб’ектаў, гатовы дзейнічаць і ўзаемадзейнічаць паміж сабой у выпадку ўзнікнення надзвычайных сітуацый сезоннага характару — моцныя ападкі, вецер, маразы, снежныя заносы і іншае. Патрабаванні да работы спецыялістаў, наяўнасці і работы спецыяльнай тэхнікі прысутным нагадаў старшы інжынер групы арганізацыі функцыянавання ДСНС і ГА раённага аддзела па надзвычайных сітуацыях Аляксей Гарбуз. Было адзначана таксама, што не толькі службы, але і насельніцтва раёна павінна быць гатовым і правільна паводзіць сябе ў выпадку ўзнікнення надзвычайных сітуацый, таму сярод людзей трэба ўзмацніць растлумачальную работу, у тым ліку і праз раённую газету. А значыць, адпаведныя тэматычныя артыкулы, падрыхтаваныя карэспандэнтамі рэдакцыі і інспектарамі аддзела па надзвычайных сітуацыях, з’явяцца на яе старонках у бліжэйшы час.
Т. ЛУКАШЭВІЧ
