На Новы год у Беларусі будзе адліга
На Новы год у Беларусі будзе сырое надвор’е, адліга, паведаміў у Facebook начальнік службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджання і маніторынгу навакольнага асяроддзя Мінпрыроды Дзмітрый Рабаў.
Пераважна па паўночным усходзе пройдзе мокры снег і дождж. У некаторых раёнах прагназуецца слабы туман, галалёд, на дарогах галалёдзіца.
У суботу, 31 снежня, раніцай і ўдзень у некаторых раёнах па Віцебскай вобласці чакаецца ўзмацненне ветру парывамі да 15-17 м/с. Тэмпература ўначы складзе ад мінус 5 да плюс 1 градуса, удзень – ад 2 градусаў марозу да 4 градусаў цяпла. У нядзелю, 1 студзеня, у паўночных і цэнтральных раёнах Беларусі пройдуць кароткачасовыя ападкі, пераважна з дажджом. Магчымы слабы туман, галалёд, на дарогах галалёдзіца. Тэмпература ўначы складзе ад мінус 4 па поўдні да плюс 2 градусаў па поўначы краіны. Удзень – ад 1 градуса ніжэй за нуль да 5 градусаў цяпла.
Сапраўды каляднае марознае надвор’е ўсталюецца ў суботу, 7 студзеня. Яго будзе вызначаць вобласць высокага атмасфернага ціску. Прагназуецца пераменная воблачнасць, без істотных ападкаў, толькі ўдзень па Гомельскай вобласці пройдзе невялікі снег. Тэмпература паветра ўначы складзе ад мінус 15 да мінус 20 градусаў. Удзень чакаецца ад мінус 11 да мінус 16 градусаў.