Арыентацыя на здаровы лад жыцця і экалагічная культура насельніцтва сталі тэмамі для абмеркавання падчас правядзення ў Глускім раёне стажыроўкі ідэалагічных кадраў Магілёўскай вобласці. У мерапрыемстве прынялі ўдзел ідэалагічныя работнікі з Магілёўскага, Бабруйскага, Кіраўскага, Асіповіцкага, Клічаўскага і Быхаўскага раёнаў, а таксама з гарадоў Магілёва і Бабруйска. Гасцей і калег сустракалі начальнік аддзела ідэалагічнай работы, культуры і па справах моладзі Глускага райвыканкама Наталля Гулевіч і яе намеснік Сяргей Слічонак. Знаёмства з раёнам пачалося з наведвання мясцовага гісторыка-краязнаўчага музея, потым удзельнікі семінара пабывалі на кацельнай № 2 Глускага “Жылкамгаса”, якая працуе на чатырох відах паліва, у тым ліку на саломе. Як патлумачыў намеснік дырэктара па цеплавой гаспадарцы Леанід Трыбуш, пушчаная ў эксплуатацыю ў 2011 годзе, гэта была першая кацельная ў нашай краіне, на якой выкарыстоўваўся такі від паліва. Намеснік дырэктара па ідэалагічнай рабоце Дзмітрый Арцёмчык расказаў, як на іх прадпрыемстве арганізавана фізкультурна-спартыўная і культурна-масавая работа.
На пастаянным лясным гадавальніку Глускага лясгаса ўдзельнікаў семінара сустракалі намеснік дырэктара па ідэалагічнай рабоце Іван Вяргун і інжынер па лесаўзнаўленні Сяргей Дзятлаў, правялі гасцей па тэрыторыі, паказалі, як глускія лесаводы вырошчваюць саджанцы сасны, елкі, дуба, дэкаратыўных кустоў, а нядаўна пасадзілі каля сотні кедраў. З вопытам работы школьнага лясніцтва ідэолагі пазнаёміліся ва Усцярхоўскай школе, а ў гімназіі Глуска ім расказалі пра фарміраванне ў вучняў арыентацыі на здаровы лад жыцця праз этнапедагогіку і выяўленчае мастацтва.
Калектыўная размова за круглым сталом пра сучасныя накірункі і метады работы па фарміраванні здаровага ладу жыцця адбылася ў раённым гісторыка-краязнаўчым музеі. Перад удзельнікамі семінара-стажыроўкі выступілі і адказалі на іх пытанні метадыст аддзела адукацыі, спорту і турызму Мікалай Купчэня, выконваючая абавязкі першага сакратара райкама БРСМ Ганна Царык, намеснік дырэктара ААТ “Глуская Зара” па ідэалагічнай рабоце Наталля Акуліч. Абагуліла ўсё сказанае і падвяла вынікі калектыўнай гутаркі начальнік аддзела ідэалагічнай работы, культуры і па справах моладзі Глускага райвыканкама Наталля Гулевіч. Падчас абмену меркаваннямі ўдзельнікі стажыроўкі адзначылі, што ў кожным раёне ёсць свае асаблівасці, адметныя вытворчасці і свае цікавыя напрацоўкі ў тым ці іншым накірунку, пабачыць усё гэта, паслухаць каментарыі спецыялістаў было ў аднолькавай ступені карысна і цікава.
Т. ЛУГАВАЯ
Фота С. РУДЗІНСКАГА
