Мітынг ля памятнага знака
Ёсць традыцыі, якія парушаць не тое што нельга, але і не хочацца, таму што яны не штучнага паходжання, а народжаны і падтрымліваюцца самім жыццём. Да такіх адносіцца ўшанаванне воінаў-інтэрнацыяналістаў, што традыцыйна адбываецца 15 лютага, у дзень вываду савецкіх войскаў з Афганістана. Да гэтай памятнай даты ў школах раёна пройдуць урокі Мужнасці, сустрэчы з былымі афганцамі, іншыя тэматычныя мерапрыемствы, а ў бібліятэках будуць наладжаны тэматычныя выставы літаратуры.
Для ўшанавання памяці тых, хто загінуў пры выкананні інтэрнацыянальнага абавязку, і ў знак павагі да воінаў-афганцаў, што жывуць сярод нас, прадстаўнікі грамадскіх арганізацый, вучнёўскіх і працоўных калектываў і самі воіны-інтэрнацыяналісты 15 лютага збяруцца ў Глуску на традыцыйны мітынг. Урачыстасць пачнецца ў 10 гадзін ля памятнага знака воінам-інтэрнацыяналістам, устаноўленага ў скверы па вуліцы Кірава. Прадпрыемствы і арганізацыі, дзе працуюць воіны-інтэрнацыяналісты, павінны не толькі даць ім магчымасць прыняць удзел у гэтым мітынгу, але і павіншаваць іх у сваіх працоўных калектывах, аказаць матэрыяльную дапамогу. Зноў жа па традыцыі воіны-афганцы наведаюць магілы загінуўшых і памёршых сваіх баявых таварышаў.