Мы разам, мы помнім
З той пары, як у 2008 годзе ў Глуску паставілі памятны знак воінам-інтэрнацыяналістам, кожнае 15 лютага ля яго сустракаюцца ветэраны афганскай вайны, каб успомніць сваю армейскую службу, баявых таварышаў, далёкую гарачую кропку, дзе дзесяць год лілася кроў савецкіх салдат. Больш за 800 беларусаў загінулі на вайне ў Афганістане, соцень параненых, цялесна і духоўна пакалечаных хлопцаў не стала ўжо пасля яе… Іх пайменна ўспамінаюць 15 лютага па ўсёй Беларусі. Іх магілы, калі яны ёсць на радзіме, абавязкова наведваюць у гэты дзень.
На мітынг, прысвечаны Дню памяці воінаў-інтэрнацыяналістаў, як заўсёды, збіраецца шмат глушчан. Ля памятнага знака выстрайваюцца ўдзельнікі баявых дзенняў у гарачых кропках, побач з імі — кіраўніцтва раёна, старшакласнікі глускіх школ, прадстаўнікі працоўных калектываў, грамадскіх аб’яднанняў і партый. Тут жа запавольваюць крок прахожыя. Афганскія песні, што вырываюцца з дынамікаў, збіраюць на мітынг жыхароў бліжэйшых дамоў, у асноўным гэта пажылыя жанчыны, яны стаяць зводдаль і раз-пораз выціраюць слёзы.
Ад імя жыхароў раёна ветэранаў вайны ў Афганістане вітае старшыня Глускага райвыканкама Уладзімір Царыкаў. Ён дзякуе людзям, што выканалі загад Радзімы, рызыкуючы сваім жыццём. Яны не падвялі тады, не падводзяць і зараз: сумленна працуюць, выхоў-ваюць дзяцей і ўнукаў. Многія вядуць актыўную грамадскую дзейнасць. Асабліва адзначыў Уладзімір Царыкаў уклад воінаў-афганцаў у патрыятычнае выхаванне моладзі і ўручыў падзячныя лісты і кветкі Сяргею Лобаху і Паўлу Прыгару. Першы працуе станочнікам у фермерскай гаспадарцы “Поблін”, другі — майстар Зелянковіцкага лясніцтва.
У сваю чаргу старшыня раённай арганізацыі Беларускага саюза ветэранаў вайны ў Афганістане Міхаіл Тылец падзякаваў раённым уладам за ўвагу да былых воінаў-афганцаў, за дапамогу. І запэўніў, што ён і яго таварышы і далей будуць прыкладаць намаганні, каб захоўваць памяць пра баявых сяброў, дапамагаць грамадству ў выхаванні падрастаючага пакалення.
Сёння, калі ўсё менш сярод нас удзельнікаў Вялікай Айчыннай вайны, менавіта на ветэра-наў-афганцаў кладзецца адказнасць расказаць моладзі пра мір і вайну, пра мужчынскі абавязак абараняць Радзіму.
Дарэчы, адметны момант: у гэты дзень ганаровую Вахту памяці ля знака воінам-інтэрнацыяналіс-там неслі салдаты тэрміновай службы, што прыбылі дадому на кароткі адпачынак. Адзін з іх — Станіслаў Фясько — сын былога афганца Сяргея Фясько. Няма сумнення, што гонар за бацьку адчуваў яго сын і гонар за сына адчуваў яго бацька.
Ірына ГРАМЫКА
Фота Сяргея РУДЗІНСКАГА
Больш здымкаў на нашым сайце ў разделе “Фотагалерэя. 2017 год”