Пераважаюць камунальныя праблемы
З 202 зваротаў, што ў мінулым годзе паступілі ў Глускі райвыканкам, па 116 прыняты станоўчыя рашэнні і просьбы грамадзян задаволены. А ўсяго летась у раённы выканаўчы камітэт і сельвыканкамы паступіла 267 зваротаў грамадзян, і гэта на 23 менш, чым у 2015-м. Як адзначаюць у аддзеле па рабоце са зваротамі грамадзян і юрыдычных асоб райвыканкама, павялічылася колькасць зваротаў праз вышэйстаячыя органы, у прыватнасці, праз Нацыянальны сход Рэспублікі Беларусь і пракуратуру Глускага раёна. На ранейшым узроўні (па колькасці) засталіся паўторныя звароты, пры гэтым прынятых здавальняючых рашэнняў па паўторных зваротах няма, і гэта сведчыць, што ўжо пры першым разглядзе пытанні былі вырашаны правільна, у адпаведнасці з заканадаўствам.
Аналіз характару паступіўшых у райвыканкам зваротаў паказаў, што па-ранейшаму пераважаюць камунальна-бытавыя праблемы, за год іх колькасць нават павялічылася і складае амаль 28 працэнтаў. Павялічылася колькасць зваротаў па пытаннях працы і заработнай платы (27), жыллёвай палітыкі (25), а таксама па судова-прававых пытаннях, пытаннях транспарту, устаноў культуры і землеўпарадкавання.
Сярод заявіцеляў амаль 28 працэнтаў складаюць пенсіянеры, каля пяці з паловай працэнтаў — людзі з інваліднасцю, па тры з паловай — шматдзетныя сем’і і ўдзельнікі Вялікай Айчыннай вайны.
Т. ЛУГАВАЯ