Пелі, гулялі, зіму праважалі
Раніцай мінулай суботы наваколле бульвара Грахоўскага поўнілася бадзёрай музыкай. Так арганізатары заклікалі глушчан на свята Масленіцы. К пачатку мерапрыемства каля кінатэатра “Арыён” ужо сабраўся невялікі натоўп, да якога паступова далучаліся ўсё новыя людзі — хто паглядзець, а хто і паўдзельнічаць у тэатралізавана-гульнявай праграме “Шырокая масленка”.
Вядучыя з раённага Дома культуры зазывалі глушчан і гасцей гарпасёлка на свята, якое з кожнай хвілінай станавілася ўсё больш шматлюдным і шумным. Вось ужо на імправізаваную сцэну, пляцоўку каля прыступак “Арыёна”, выходзяць удзельнікі народнага фальклорнага ансамбля “Спадчына”, а праз колькі хвілін іх змяняе народнае аматарскае аб’яднанне “Зносіны”. Бадзёрыя, жартоўныя, задушэўныя песні паднімаюць настрой і кранаюць душы гледачоў, і тыя кожны раз, не шкадуючы сваіх далоняў, гучна апладзіруюць самадзейным артыстам.
Калі ж настаў час памерацца сілай у пера-цягванні каната, то паказаць сваю маладзецкую ўдаласць вызваліся прадстаўнікі Аўтапарка № 15, ПМК № 249 і “Жылкамгаса”. Гэта частка мас-ленічнай праграмы выклікала асаблівую цікавасць у прысутных. Народ прыкметна ажывіўся, кожны стараўся падысці бліжэй, каб лепш бачыць, як змагаюцца сілачы. Сярод гледачоў, безумоўна, былі родзічы, знаёмыя, сябры ўдзельнікаў — аб гэтым сведчылі тыя гучныя падбадзёрванні, што чуліся то з аднаго, то з другога боку. У выніку перамога дасталася камандзе “Жылкамгаса”.
Якая ж Масленіца без гульняў ды танцаў! І тут самымі актыўнымі аказаліся юныя гледачы. Яны шчыра весяліліся падчас гульні “Сляды зімы” (і кожны з яе ўдзельнікаў атрымаў цукеркі), а потым разам з дарослымі кінуліся ў скокі. Тым часам побач ішоў бойкі гандаль блінамі, якія зараней напяклі і прапанавалі глушчанам удзельнікі аматарскага аб’яднання “Гаспадынька” раённага Дома культуры. Таксама ў іншых гандляроў можна было купіць мёд, вырабы самадзейных майстроў, розныя прысмакі…
Кульмінацыяй мерапрыемства стала спальванне пудзіла Масленіцы. Людзі вадзілі вакол вогнішча карагод з верай, што разам з пудзілам згарэла ўсё благое, што накапілася за год.
Вольга ЧУЧВАЛ
Фота аўтара