Ёсць традыцыі, работа і вынік
Сярод устаноў адукацыі, размешчаных у сельскай мясцовасці, пераможцам раённага спаборніцтва прызнаны Заеліцкі навучальна-педагагічны комплекс дзіцячы сад-сярэдняя школа. З 24 пазіцый, якія бяруцца ў разлік пры падвядзенні вынікаў работы, гэта сельская школа лідыравала па 13. Гэта і добрыя вынікі вучняў у алімпіядным руху, і актыўны ўдзел педагогаў у раённых, абласных і рэспубліканскіх мерапрыемствах і конкурсах, значныя дасягненні ў спорце, у прыватнасці, у штогадовай раённай спартакіядзе. Якасна і эфектыўна праводзіцца ў Заеліцы шосты школьны дзень, адзначана паспяховая работа па прафілактыцы правапарушэнняў і прапагандзе здаровага ладу жыцця, укараненне новых формаў у дашкольнай адукацыі, арганізацыя інтэграванага навучання. Для ацэнкі эфектыўнасці функцыянавання навучальна-педагагічных комплексаў аддзелам адукацыі, спорту і турызму праводзіўся маніторынг, і, як паказалі яго вынікі, з дзевяці крытэрыяў Заеліцкая школа па трох пазіцыях займае першае месца, па трох — другое.
Дарэчы, лепшым сярод сельскіх навучальных устаноў Заеліцкі НПК прызнаецца ўжо трэці год запар, і гэта, лічыць яго дырэктар Святлана Аляксееўна Лабадаева, сведчыць пра сістэмную і добра арганізаваную работу ўсяго калектыву, накіраваную на станоўчы вынік, а яшчэ — пра традыцыі, якія падтрымліваюцца педагогамі і вучнямі.
Таццяна ЛУКАШЭВІЧ
Фота аўтара