Ахова працы пішацца не ў кабінетах
Кацельная № 2, што па завулку Калгасным у Глуску, другая па магутнасці сярод кацельных унітарнага камунальнага прадпрыемства “Жылкамгас”. Працуе яна на змешаных відах паліва: тут устаноўлены два катлы з ручной загрузкай на дрывах, два катлы на газе і адзін — на саломе, ён быў устаноўлены ў 2011 годзе для павелічэння долі выкарыстання мясцовых відаў паліва. Гэта першая кацельная ў рэспубліцы, дзе салому сталі выкарыстоўваць у якасці паліва.
Праведзеная ў 2016 годзе мадэрнізацыя (па ўзгадненні з заводам-вытворцам) дазволіла працаваць кацельнай як на саломе, так і на шчэпках. Іх прадпрыемства купляе ў мясцовым лясгасе, а салому нарыхтоўвае сваімі сіламі. Кацельная № 2 і стала першым аб’ектам, які наведалі ў Глуску ўдзельнікі выязнога рэспубліканскага семінара Міністэрства жыллёва-камунальнай гаспадаркі Дзень аховы працы, які прайшоў на базе прадпрыемстваў ЖКГ Асіповіцкага і Глускага раёнаў. У мерапрыемстве прымалі ўдзел намеснікі кіраўнікоў і спецыялісты па ахове працы ўпраўленняў жыллёва-камунальнай гаспадаркі Брэсцкага, Віцебскага, Гомельскага, Гродзенскага, Магілёўскага аблвыканкамаў і Мінскай вобласці, старшыні абкамаў галіновых прафсаюзаў на чале са старшынёй рэспубліканскага камітэта прафсаюза, прадстаўнікі камунальных арганізацый і прадпрыемстваў Мінска, узначаліў прадстаўнічую дэлегацыю намеснік міністра ЖКГ Рэс-публікі Беларусь Алег Паскробка. Пры ўездзе ў Глускі раён гасцей з усёй рэспублікі сустрэлі караваем, прывітальныя словы сказалі намеснік старшыні райвыканкама Аляксандр Анцюшэня і дырэктар Глускага “Жылкамгаса” Юрый Дымша.
Пра работу кацельнай № 2 удзельнікам семінара расказаў намеснік дырэктара “Жылкамгаса” па кацельна-цеплавой гаспадарцы Леанід Трыбуш.
Зразумела, што такі тэхнічна складаны аб’ект, як кацельная з пяццю магутнымі катламі, патрабуе ад спецыялістаў і радавых работнікаў не толькі тэарэтычных ведаў, але і правільнай эксплуа-тацыі абсталявання на практыцы, і пры гэтым няўхільнага выканання ўсіх патрабаванняў тэхнікі бяспекі — як пры рабоце ў штатным рэжыме, так і пры ўзнікненні пазаштатнай сітуацыі. Пра дзеянні персаналу ў выпадку адключэння электраэнергіі з-за падзення дрэва на ЛЭП распавёў вядучы інжынер-энергетык “Жылкамгаса” Андрэй Іваноў. Паколькі члены дэлегацыі — гэта людзі дасведчаныя ў пытаннях эксплуатацыі цеплагенерыруючага абсталявання і выканання правілаў бяспекі, то па ходу выступлення спецыялістаў задавалі ім пытанні, цікавіліся асаблівасцямі работы менавіта гэтага аб’екта і атрымлівалі абгрунтаваныя адказы, свае каментарыі падчас гутаркі даваў таксама дырэктар “Жылкамгаса” Юрый Дымша. Прадоўжылася гаворка і ў службовых памяшканнях, што на тэрыторыі прадпрыемства. Інжынер па ахове працы Віялета Жорава расказала пра арганізацыю работы кабінета АП і пра скарачэнне колькасці рабочых месцаў са шкоднымі ўмовамі працы. У рамках Дырэктывы № 1 Прэзідэнта Рэспублікі Беларусь у “Жылкамгасе” абсталяваны спецыяльны клас па бяспецы дарожнага руху, як наладжана яго работа на прадпрыемстве, распавёў майстар па рамонце спецмашын і механізмаў Дзмітрый Сувораў.
Трэба сказаць, што Глускі “Жылкамгас” месцам правядзення рэспубліканскага семінара па ахове працы быў выбраны невыпадкова: работа па павышэнні бяспекі на вытворчасці тут вядзецца на добрым арганізацыйным узроўні, ёсць для гэтага і эканамічныя перадумовы. Так, у 2016 годзе на мерапрыемствы па ахове працы прадпрыемствам было выдаткавана больш за 100 тысяч рублёў, за пяць месяцаў бягучага года — звыш 52 тысяч. Гэта сродкі на выплаты кампенсацый і бясплатную выдачу малака пры рабоце ў шкодных і (або) небяспечных умовах працы (у “Жылкамгасе” зараз 55 такіх рабочых месцаў), на забеспячэнне работнікаў індывідуальнымі і калектыўнымі сродкамі аховы, на выкананне мерапрыемстваў пажарнай бяспекі, набыццё і даўкамплектаванне аптэчак першай меддапамогі, рамонт санітарна-бытавых памяшканняў, іх забеспячэнне абсталяваннем і бытавой тэхнікай і на шмат якія іншыя патрэбы і дзеянні, што служаць павышэнню тэхнікі бяспекі. У гэтай сувязі красамоўны той факт, што за апошнія 10 год на прадпрыемстве адбыўся толькі адзін няшчасны выпадак на вытворчасці з траўмай, якая не адносіцца да цяжкіх. А значыць, уся праводзімая работа дае свой плён.
Задача любога наймальніка, у тым ліку і ў арганізацыях сферы жыллёва-камунальнай гаспадаркі, — стварыць такія ўмовы працы, каб кожны чалавек, што прыйшоў на работу, вярнуўся дамоў жывым і здаровым, адзначыў падчас пленарнага пасяджэння намеснік міністра жыллёва-камунальнай гас-падаркі Алег Паскробка. Для гэтага і патрэбны ўсе мерапрыемствы па ахове працы, якія былі прадэманстраваны на розных аб’ектах у ходзе правядзення выязнога семінара, на гэта накіраваны строгія патрабаванні выканання работнікамі працоўнай дысцыпліны. Бо правілы аховы працы пішуцца не ў кабінетах, а на практыцы, пішуцца людзьмі і для людзей, для іх бяспекі. Нагадаць пра ўсё гэта яшчэ раз закліканы месячнік па ахове працы ў сістэме ЖКГ, які пачнецца 1 ліпеня.
Т. ЛУКАШЭВІЧ
Фота С. РУДЗІНСКАГА