Аўтобуса пачакаць і Багдановіча пачытаць
Калі вам давядзецца праязджаць па дарозе на Акцябрскі, не пашкадуйце часу — завярніце ў Касарычы. Тут у пачатку вёскі вы пабачыце, не пабаюся высокіх слоў, сапраўдны арт-аб’ект. Шчыра кажучы, аб’ект — аўтобусны прыпынак — тут быў даўно, а вось арт-аб’ектам ён стаў з нядаўняга часу. Невядомыя мастакі ператварылі дарожнае збудаванне ў “кнігу”. Ілюстрацыі — беларускі арнамент і выява нашага нацыянальнага сімвала — бусла ў гняздзе — суправаджаюць радкі верша Максіма Багдановіча “Я вспоминаю дом старинный…” і яго ж байкі “Варона і чыж”. Касарычы — радзіма Ягора Лук’янавіча Багдановіча, дзеда славутага паэта. І хаця сам Максім Багдановіч, хутчэй за ўсё, ніколі не бываў у нашых мясцінах, касарычане ганарацца тым, што іх вёска — выток знакамітага роду. Ды і ўвогуле ганарацца сваёй вёскай, захоўваюць памяць аб падзеях яе мінулага і абавязкова перадаюць гэту памяць сваім унукам і праўнукам.
Алена ВАЛОШКА
Фота аўтара