Дзяржаўная лесагаспадарчая ўстанова “Глускі лясгас” — адно са стабільна працуючых у раёне прадпрыемстваў. Менавіта там прайшоў першы (з 15 запланаваных) сход працоўнага калектыву са справаздачай кіраўніка аб выніках работы за першае паўгоддзе. На сходзе прысутнічалі старшыня райвыканкама Уладзімір Царыкаў і яго намеснік Дзмітрый Цімчанка, старшыня раённага Савета дэпутатаў Андрэй Баброўнік, начальнік аддзела ідэалагічнай работы, культуры і па справах моладзі Наталля Гулевіч і яе намеснік Сяргей Слічонак.

Як адзначыў у сваім выступленні дырэктар лясгаса Сяргей Максімовіч, асноўнымі задачамі прадпрыемства з’яўляюцца ўзнаўленне і ахова лесу, выкананне мерапрыемстваў лясной гаспадаркі, работы па нарыхтоўцы і перапрацоўцы драўніны, рэалізацыя лесапрадукцыі і знешнеэканамічная дзейнасць. За першае паўгоддзе лясгас выканаў усе даведзеныя вытворчыя паказчыкі і спрацаваў з прыбыткам, рэнтабельнасць рэалізаванай прадукцыі склала 10,4 працэнта. Былі набыты тры легкавыя аўтамабілі, пагрузчык “Амкадор” і лесавоз, да канца года плануецца купіць яшчэ пяць адзінак тэхнікі. У канцы верасня — пачатку кастрычніка будзе ўведзена ў дзеянне новая лінія лесапілення, якая дасць прадпрыемству дадатковай экспартнай выручкі 110 тысяч еўра ў месяц, акрамя таго, пачаргова вядзецца рамонт адміністрацыйных будынкаў лясніцтваў і бытавых памяшканняў цэха дрэваапрацоўкі. Сярэдняспісачная колькасць працуючых лясгаса 401 чалавек, сярэднямесячная заработная плата за шэсць месяцаў тут склала 733 рублі, і гадавое заданне па зарплаце ў тысячу рублёў Сяргей Максімовіч лічыць рэальным, паколькі ўжо зараз асобныя работнікі, занятыя на лесанарыхтоўцы, атрымліваюць па тысячы дзвесце — тысячы шэсцьсот рублёў у месяц.

Адказваючы на пытанне старшыні райвыканкама Уладзіміра Царыкава аб перспектывах развіцця прадпрыемства, Сяргей Максімовіч сказаў пра мадэрнізацыю сушыльнай і гадавальніцкай гаспадарак, пра блізкі запуск новай лініі па вытворчасці кола акоранага. Але ўвага тут надаецца не толькі абнаўленню матэрыяльнай базы, а яшчэ вучобе і абнаўленню кадраў. Так, у гэтым годзе Глускі лясгас выдаў тры мэтавыя накіраванні ў вышэйшыя навучальныя ўстановы і два накіраванні на вучобу ў тэхнікумы ляснога профілю. Так што прадпрыемства жыве не толькі сённяшнім днём, але дбае і пра будучыню, мае для гэтага трывалы эканамічны падмурак.

Т. ЛУКАШЭВІЧ

Фота С. РУДЗІНСКАГА