У пятніцу і суботу 11 і 12 жніўня ў зоне адпачынку “Лысуха” было шматлюдна, шумна і весела. Тут сабраліся прадстаўнікі васьмі арганізацый раёна, каб паўдзельнічаць у штогадовым турыстычным злёце. Дабаўце сюды балельшчыкаў, арганізатараў і тых, каму проста цікава было папрысутнічаць на гэтым моладзевым свяце. Хаця, шчыра кажучы, турзлёт — гэта такая справа, якая не ведае абмежаванняў па ўзросце, таму побач з зусім маладымі былі і вопытныя, спрактыкаваныя турысты, можна сказаць, старажылы турысцкага руху. Трэба ж, каб нехта вучыў і накіроўваў пачаткоўцаў.

А каманды былі вось якія. Сваіх прадстаўнікоў на злёт “камандзіравалі” Аўтапарк № 15, Глускае райпо, “Жылкамгас”, цэнтральная раённая бальніца, лясгас, Веснаўскі дом-інтэрнат, ААТ “Аграфірма “Слаўгарадскі”, была таксама зборная дзяржустаноў.

“Канешне, важныя вынікі, важныя перамогі, але самае галоўнае, што сёння тут сабраліся нераўнадушныя да актыўнага адпачынку людзі, людзі, якія ведаюць, што такое сяброўства”, — з такімі словамі звярнуўся да ўдзельнікаў мерапрыемства намеснік старшыні райвыканкама Дзмітрый Цімчанка і пажадаў усім камандам ні пуха ні пер’я. Да пажаданняў поспеху ў спаборніцтвах далучыліся старшыня раённага аб’яднання прафсаюзаў Аляксандр Леўчанка і першы сакратар райкама БРСМ Ганна Царык.

А ўдача ўдзельнікам ой як была патрэбна, бо наперадзе іх чакалі сур’ёзныя іспыты, спартыўныя і творчыя.

Па-першае, камандам было дадзена дамашняе заданне — падрыхтаваць візітоўкі, і тут ужо ўсе пастараліся, наколькі хапіла фантазіі і дазволіла пачуццё гумару. Адны “прэзентавалі” пайменна і далі поўную характарыстыку ўсім членам каманды, другія, як, напрыклад, медыкі, зрабілі акцэнт на прафесіі. Арыгінальна і нават самакрытычна расшыфравалі назву сваёй арганізацыі ўдзельнікі з “Жылкамгаса”: “ЖКХ” — “Жалуйтесь, кому хотите!”. На думку журы, лепш за ўсіх да гэтага конкурсу падрыхтаваліся каманды Веснаўскага дома-інтэрната — 3-е месца, дзяржустаноў — 2-е месца,  першай тут стала зборная раённай бальніцы.

Несумненна, творчым можна назваць і конкурс турыстычнага быту, бо камандам трэба было ўладкаваць свой лагер такім чынам, каб ён адпавядаў усім правілам паходнага жыцця і бяспекі, а таксама заяўленай тэме турзлёту — “Год навукі”. Да таго ж неабходна было яшчэ і прэзентаваць свой лагер найлепшым чынам перад камісіяй. З гэтымі заданнямі, па меркаванні журы, найбольш удала справіліся ўдзельнікі са “Слаўгарадскага”, у іх 3-е месца, 2-е месца падзялілі ЦРБ і Глускае райпо, 1-е месца заняла зборная дзяржустаноў, якая свой лагер ператварыла ў сапраўдную навуковую лабараторыю.

Конкурс песні, як заўсёды, паказаў, што на Глушчыне нямала талентаў-самародкаў, людзей, што могуць не толькі лячыць, вучыць дзяцей, вырошчваць хлеб, гандляваць і сачыць за парадкам, але і цудоўна спяваць. Асабіста мне вельмі спадабалася выступленне хлопцаў і дзяўчат са “Слаўгарадскага”, яны так душэўна выканалі “класіку” турысцкага жыцця — песню Алега Міцяева “Как здорово, что все мы здесь сегодня собрались…”. З хітом ужо некалькіх пакаленняў “Батарейка” выступіла каманда Глускага райпо, а падпявалі і падтанцоўвалі выканальнікам, мабыць, усе, хто быў на паляне. У выніку райпо тут заняло 3-е месца, на 2-м месцы — зборная дзяржустаноў, а першымі сталі медыкі, падрыхтаваўшыя сапраўднае касцюміраванае шоу.

Творчая састаўляючая прысутнічала і ў конкурсе паходных страў. Шашлыкі, бульба, рыбка запечаная залатая, запечаны з лісічкамі трус, зноў лісічкі, толькі ўжо ў супе і аж у трох варыянтах… І ўсё гэта яшчэ падавалася з рознымі соусамі, было аздоблена зяленівам і ўжо адным выглядам выклікала апетыт. Пэўна, журы было цяжка, ой як цяжка выбраць лепшую страву. Дарэчы, суддзі звярталі ўвагу не толькі на смак, але і на афармленне стравы і арыгінальнасць яе падачы. У выніку трэцяе месца падзялілі паміж сабой адмыслова аформлены духмяны шашлык ад каманды Глускага райпо, люля-кебаб і плоў ад каманды лясгаса, другое месца заняла мясная страва ад зборнай дзяржустаноў. Першае месца ў гэтым конкурсе журы безагаворачна аддало страве пад назвай “Лебядзінае возера”, якую падрыхтавала каманда ЦРБ. Уявіце сабе выразанага з гарбуза прыгожага лебедзя, запоўненага рулецікамі з лаваша, побач — чарот са смажаных на кастры сасісак, замест сцяблін — пер’е цыбулі, тут жа — гняздзечкі з перапялінымі яйкамі. Ну вельмі прыгожа, і сапраўды можна прыгатаваць у паходзе, а яшчэ і пададзена было пад бессмяротны танец маленькіх лебедзяў.

Канешне, самымі цяжкімі былі спартыўныя спаборніцтвы, тым болей што ў першы дзень камандам трэба было турыстычную эстафету, не скажу, каб вельмі лёгкую, прайсці, у валейбол адыграць і яшчэ канат пацягаць. У эстафеце на 3-е месца выйшла каманда ЦРБ, другімі сталі лясгасаўцы, а 1-е месца занялі турысты са “Слаўгарадскага”, усе этапы яны прайшлі, калі не памыляюся, за 5 хвілін 47 секунд. На валейбольнай пляцоўцы эмоцыі разгарэліся не на жарт, не меншыя, чым падчас якога чэмпіянату свету. У паядынку за 3-е месца сышліся каманды Веснаўскага дома-інтэрната і дзяржустаноў, апошнія і сталі прызёрамі. За 1-е і 2-е месцы змагаліся лясгас і “Слаўгарадскі”, пасля цяжкай барацьбы перамога дасталася прадстаўнікам аграфірмы. Ну а ўжо калі перацягвалі канат, пачуцці проста зашкальвалі, і ў гульцоў, і ў заўзятараў. У фінальнай схватцы хлопцы з “Жылкамгаса” літаральна “ўкапаліся” ў зямлю, і лясгасаўцам прыйшлося прыкласці неймаверныя намаганні, каб хоць крыху зрушыць сапернікаў з месца. Пасля дзвюх спроб выйшла нічыя, і толькі трэцяя, вырашальная, вызначыла пераможцу. Такім чынам, у перацягванні каната перамагла каманда лясгаса, на 2-м месцы — “Жылкамгас”, трэцяй стала зборная дзяржустаноў, якая змагла пераадолець каманду райпо.

А назаўтра турыстаў зноў чакалі іспыты, праўда, у іх не ўдзельнічала каманда Аўтапарка № 15.

Раённы аддзел па надзвычайных сітуацыях падрыхтаваў эстафету. Калі ў мінулым годзе некаторыя заданні ад ратаўнікоў, на маю думку (і думку тагачасных удзельнікаў), былі занадта складаныя, то ў гэты раз этапы аказаліся ў меру цяжкімі, пры гэтым ніяк не страцілі сваёй цікавасці. Дарэчы, хачу выказаць шчырае захапленне самімі ратаўнікамі. Яны так хутка і спрытна надзявалі баявую форму і спраўляліся са спецыяльнымі прыладамі, што, каб не бачыла на свае вочы, не паверыла б, што на гэта траціцца літаральна некалькі секунд.  Канешне, у канкурсантаў атрымлівалася не так удала, і на этапах, бывала, спатыкаліся і падалі (а хто б не ўпаў, калі на табе колькі там кіло “баёўкі” ці ў руках пажарны рукаў, а ён таксама не пярынка). Але яны малайцы: беглі, цягнулі калёсы, пераносілі “пацярпелых”, размотвалі рукавы — усё дзеля перамогі. У тройку прызёраў па выніках гэтага конкурсу ўвайшлі каманды “Жылкамгаса” (3-е месца), дзяржустаноў (2-е), а на 1-м месцы апынуліся “слаўгарадчане” (нехта з балельшчыкаў трапна сказаў, што яны “праляцелі эстафету, быццам віхор”).

У спаборніцтвах па дартсе ўдзельнічалі асобныя прадстаўнікі ад кожнай каманды, таму прызёраў, што прынеслі ім найбольшыя балы, назаву пайменна. Вынік Святланы Нікіткі з лясгаса — 31, у Сяргея Каранькова з райпо — 32, у Ігара Бараноўскага, зборная дзяржустаноў, — 40, і гэта адпаведна 3-е, 2-е і 1-е месцы.

Спаборніцтвы па армрэслінгу ішлі па-за конкурсам, але бачылі б вы, з якім напружаннем фізічных сіл і эмоцый, з якім запалам мужчыны змагаліся за лідарства. Мне здаецца, што ўдзельнікаў заводзілі як перамогі, так і паражэнні, і яны зноў і зноў падыходзілі да спецыяльнага стала, каб даказаць сілу рук і духу. Невядома, колькі б гэта ўсё прадаўжалася, калі б арганізатары не забралі той самы стол для армрэслінгу. Але прызёры былі вызначаны. Дыплом за 3-е месца ў гэтым спаборніцтве атрымаў Андрэй Мазалеўскі, 2-е месца заняў Андрэй Радзько, а першым стаў Аляксандр Царык.

Урэшце надышоў час падводзіць агульныя вынікі турзлёту. Акрамя прызавых месцаў, журы вырашыла даць асобны дыплом “За крэатыўнасць” камандзе Глускай ЦРБ і дыплом “За волю да перамогі” — камандзе Веснаўскага дома-інтэрната. Што датычыцца прызёраў, 3-е месца заняла каманда ААТ “Аграфірма “Слаўгарадскі”, 2-е — прадстаўнікі Глускага лясгаса, пераможцам турзлёту стала зборная дзяржустаноў.

Мне ж застаецца толькі падзякаваць за два цудоўныя дні турзлёту яго ініцыятарам і непасрэдным арганізатарам, гэта раённы камітэт БРСМ, раённае аб’яднанне прафсаюзаў, аддзел ідэалагічнай работы, культуры і па справах моладзі і аддзел адукацыі, спорту і турызму Глускага райвыканкама, раённы аддзел па надзвычайных сітуацыях.

Аксана ВАСІЛЕЎСКАЯ

Больш фота ў раздзеле “Фотагалерэя. 2017 год”