Гэта жніво для Юрыя Няборскага ўжо дваццаць пятае, і ён лічыцца старэйшым камбайнерам у ААТ “Турыно-агра”. Пачынаў у 1992 годзе памочнікам камбайнера, а праз пяць гадоў ужо  сам узначаліў экіпаж. Працаваў шчыра і сумленна, і за ўвесь гэты час намалаціў не адну тысячу тон зерня. Неаднаразова сярод экіпажаў сваёй гаспадаркі быў лепшым і ўваходзіў у лік перадавікоў раёна, у мінулым годзе стаў тысячнікам. І здарылася такое літаральна пад самы канец уборачнай. Гэта было прыемнай навіной як для самога Юрыя Мікалаевіча, так і для кіраўніцтва гаспадаркі. І калі ў гэтым годзе пачыналі жніво, то першым выйсці ў поле даручылі менавіта Юрыю Няборскаму. У гэтым годзе ў памочніках яго старэйшы брат Уладзімір, які часова змяніў мінскую прапіску на сельскую. Жніво пачалося з палёў, на якіх вырошчвалася трыцікале. Першы дзень прынёс невялікі намалот: з 13 гектараў сабралі 27 тон.

— Гэта толькі пачатак, далей і тэмпы будуць хутчэйшыя, і намалоты большыя, — кажа Юрый Мікалаевіч. — Толькі наўрад ці ўдасца дасягнуць мінулагодняга паказчыка. Хаця б тон 700 намалаціць. Ураджай не вельмі радуе. Дык мы ж пачалі з азімых, а яравыя культуры будуць і таго менш. Але рукі апускаць не варта. Для нас, хлебаробаў, важна адно: сабраць усё вырашчанае без страт. Гэтага і будзем прытрымлівацца ў сваёй рабоце.

Па словах   антыкрызіснага кіраўніка “Турыно-агра”  Аляксея Мігая, хлебаробам гаспадаркі сёлета патрэбна ўбраць 525 гектараў азімых зерневых і 240 — яравых. І зробяць гэта сіламі трох экіпажаў.  Акрамя братоў Няборскіх, на ўборцы зерневых заняты яшчэ два экіпажы, маладзёжныя, — Аляксандр Панкрацьеў з Ігарам Дымшам і Васіль Буднік з Анатолем Савончыкам. Застаецца толькі пажадаць усім удалага жніва.

В. ЧУЧВАЛ

Фота С. РУДЗІНСКАГА