Колькасць крадзяжоў дзяржаўнай і грамадскай маёмасці сяголета ў параўнанні з мінулым годам знізілася і склала 4 выпадкі, з іх у сферы аграпрамысловага комплексу здзейснена 2 крадзяжы, абодва адбыліся ў эксперыментальнай базе “Глуск”. Так, з 13 на 14 сакавіка невядомая асоба са склада ў вёсцы Барысаўшчына ўкрала 4,6 тоны ячменю, сума ўрону складае 1 495 рублёў. У пачатку красавіка з тэрыторыі малочнатаварнай фермы ў вёсцы Краснае мясцовы жыхар, дарэчы, работнік фермы, украў двух бычкоў на агульную суму 1 213 рублёў. Следчым камітэтам была ўзбуджана крымінальная справа, суд асудзіў вінаватага на 2 гады пазбаўлення волі, урон гаспадарцы кампенсаваны ў поўным аб’ёме.

Па словах начальніка раённага аддзела ўнутраных спраў Ігара Качалава, асноўнымі прычынамі гэтых крадзяжоў сталі адсутнасць замкоў на складзе і халатныя адносіны да захавання маёмасці — у першым выпадку, а таксама адсутнасць кантролю за перадачай жывёлы ад вартаўніка да загадчыка фермы і прыняцце на работу начным даглядчыкам жывёлы чалавека, неаднаразова судзімага за маёмасныя злачынствы. Такія факты прыводзіліся падчас пасяджэння раённага выканаўчага камітэта, якое адбылося 6 верасня. У яго рабоце прынялі ўдзел памочнік Прэзідэнта Беларусі — інспектар па Магілёўскай вобласці Генадзь Лаўранкоў, галоўны спецыяліст упраўлення арганізацыйна-кадравай работы аблвыканкама Ірына Давыдзенка і дэпутат Савета Рэспублікі Нацыянальнага сходу Рэспублікі Беларусь Ірына Пятрова.

Першым у парадку дня разглядалі пытанне аб выкананні раней прынятага рашэння па арганізацыі захаванасці таварна-матэрыяльных каштоўнасцей сельскагаспадарчых арганізацый Глускага раёна. Як паведаміў начальнік РАУС Ігар Качалаў, начнымі рэйдавымі мабільнымі групамі з ліку супрацоўнікаў міліцыі было абследавана 56 аб’ектаў захоўвання таварна-матэрыяльных каш-тоўнасцей, было накіравана 117 прадпісанняў аб ухіленні выяўленых недахопаў, на 10 пасадных асоб складзены адміністрацыйныя пратаколы. Штодзённымі рэйдавымі групамі міліцыі зафік-савана 16 фактаў адсутнасці вартаўнікоў на рабочых месцах (у РАПТЗе, ААТ “Турыно-агра”, “Зара Камуны”, “Глуская Зара” і эксбазе “Глуск”) і 12 фактаў знаходжання вартаўнікоў на рабочых месцах у нецвярозым стане (у эксбазе “Глуск” (8 фактаў), РАПТЗе, ААТ “Турыно-агра”, “Зара Камуны”). Таксама ў ходзе правядзення рэйдаў і што-дзённай работы супрацоўнікаў РАУС выяўлена 12 фактаў дробных крадзяжоў маёмасці арганізацый (у ААТ “Глуская Зара” (4 факты), РАПТЗе, “Турыно-агра”, эксбазе “Глуск” і аграфірме “Слаўгарадскі”). Падчас уборачнай кампаніі міліцыянерамі неаднаразова выяўляліся факты эксплуатацыі транспарту сельгасарганізацый кіроўцамі без правоў, тэх-ніка на мехдварах захоўвалася незамыкнутай, а ключы часам знаходзіліся прама ў замку запальвання, у некаторых выпадках меўся свабодны доступ да кормаўборачных камбайнаў і трактароў, прасушанае зерне захоўвалася не ў складскім памяшканні, а таксама было ў свабодным доступе.

Для захавання таварна-матэрыяльных каштоў-насцей і недапушчэння крадзяжоў маёмасці сель-гасарганізацый, зазначыў Ігар Качалаў, кіраўнікам арганізацый было рэкамендавана абсталяваць аб’екты ахоўна-пажарнай сігналізацыяй, заключыць часовыя дагаворы на ахову насеннага фонду і іншых матэрыяльных каштоўнасцей, устанавіць сістэмы відэаназірання і відэарэгістрацыі на ўездах і выездах з тэрыторый фермаў, комплексаў і мех-двароў, аднак ні ў адной сельгасарганізацыі гэта не было зроблена. Прычына — адсутнасць сродкаў. Па гэтай жа прычыне не быў выкананы пункт раней прынятага рашэння выканкама па ўстаноўцы на ўсе энерганасычаныя сельгасмашыны GPS-наві-гатараў. З усяго сказанага вынікае, робіць вывад начальнік РАУС, што работа па захаванні таварна-матэрыяльных каштоўнасцей у сельгасарганізацыях раёна знаходзіцца ў нездавальняючым стане.

У дапаўненне сказанага пацвердзіў некаторыя факты і назваў іншыя прыклады неналежнага захоўвання таварна-матэрыяльных каштоўнасцей у ААТ “Турыно-агра” пракурор раёна Леанід Палевіч, абапіраючыся на вынікі праверкі, праведзенай пракуратурай у гэтай гаспадарцы.

Са свайго боку Генадзь Лаўранкоў заўважыў, што міліцыя не павінна браць на сябе функцыю аховы аб’ектаў — для гэтага існуюць іншыя структуры і падраздзяленні, яе задача — у прафілактыцы зла-чынстваў і ў іх раскрыцці. Між тым раскрыты не ўсе злачынствы, дапушчаныя ў аграпрамысловым комплексе. З пачаткам актыўных палявых работ на аўтазаправачнай станцыі Глуска чамусьці зні-жаецца продаж паліва, хаця павінна быць наадварот (ва ўласнасці жыхароў раёна больш за 300 трактароў), а вось фактаў незаконнага продажу паліва мясцовымі механізатарамі трэцім асобам міліцыяй так і не было зафіксавана. Вось над чым трэба працаваць больш актыўна і больш плённа, заўважыў Генадзь Лаўранкоў.

Пасля свае тлумачэнні па названых праблемах (чаму сталі магчымымі тыя ці іншыя парушэнні ў гаспадарках, што зроблена па недапушчэнні падобнага ў будучым і чаму не выкананы ўсе пункты рашэння райвыканкама па захаванні таварна-матэрыяльных каштоўнасцей)  давалі антыкрызісны кіраўнік “Турыно-агра” Аляксей Мігай, дырэктар ААТ “Аграфірма “Слаўгарадскі” Уладзімір Штылёў і дырэктар ААТ “Глуская Зара” Леанід Буры. Яны прызналі, што па многіх фактах меў месца недагляд з боку кіраўніцтва, аднак пэўныя мерапрыемствы для паляпшэння сітуацыі з захаваннем матэрыяльных каштоўнасцей ужо выканананы, будуць устаноўлены і GPS-навігатары на энерганасычаную тэхніку, праўда, не адразу, паколькі на гэта патрэбны сродкі.

Т. ЛУКАШЭВІЧ