Першы ў новым навучальным годзе званок даюць Валянцін Варонін і Кацярына Сысой
Усім вядома: калі даюць падарункі — значыць, свята. Першакласнікі Усцярхоўскай школы ў свой першы школьны дзень добра зразумелі, што Дзень ведаў — гэта сапраўды свята, бо падарункаў на ўрачыстай лінейцы атрымалі нямала.
Гэта ў першую чаргу кніга “Беларусь — наша Радзіма” — падарунак Прэзідэнта рэспублікі, які дзяўчынкам і хлопчыкам уручыў старшыня Глускага райвыканкама Уладзімір Царыкаў. Таксама кожны першакласнік атрымаў невялікія карысныя сувеніры на памяць пра гэты дзень ад шэфаў — ААТ “Зара Камуны” і глускага філіяла “Беларусбанка”, іх падарылі кіраўнікі гэтых арганізацый Вячаслаў Радчыкаў і Надзея Хмылова. Дарэчы, работнікі банка таксама прывезлі з сабою і торт, ды такі вялікі, што яго павінна хапіць не толькі на 11 першакласнікаў, але на ўсіх 59 школьнікаў. На карысць усіх вучняў паслужыць і офісная тэхніка, якую школа атрымала ў падарунак ад раённага выканаўчага камітэта. Канешне, гучалі ў гэты дзень віншаванні з новым навучальным годам, пажаданні моцнага здароўя дзецям, іх бацькам і настаўнікам, каб лёгкай была вучоба і трывалымі веды.
Дырэктар Усцярхоўскага НПК Віктар Сасноўскі падзякаваў гасцям і ўсім шэфам за іх увагу, за тое, што, нягледзячы на занятасць, знаходзяць час, каб наведаць вучняў, пацікавіцца праблемамі і патрэбамі школы, і, галоўнае, дапамагаюць іх вырашаць і задавальняць. І робяць гэта не толькі ад выпадку да выпадку, а пастаянна.
У сваю чаргу вучні радуюць сваіх настаўнікаў і ўсіх, хто пра іх клапоціцца, добрымі ведамі і ўчынкамі. Вось і на лінейцы падзякі ад кіраўніцтва школы атрымалі вучань 5-га класа Максім Брычонак і вучаніца 3-га класа Лізавета Лёзава. А права даць першы ў гэтым навучальным годзе званок даверылі адзінаццацікласніку Валянціну Вароніну і першакласніцы Кацярыне Сысой.
Увогуле, лінейка ва Усцярхоўскай школе атрымалася па-дамашняму ўтульнай, цёплай і спакойнай, і было поўнае адчуванне вялікай дружнай школьнай сям’і, якая сабралася на агульнае свята.
Аксана ВАСІЛЕЎСКАЯ
Фота Сяргея РУДЗІНСКАГА
Больш фота глядзіце ў раздзеле «Фотагалерэя. 2017 год»
