Глуск, вуліца Кірава
Першаму здымку крыху больш за 50 гадоў — зроблены ён 9 сакавіка 1966 года на вуліцы Кірава ў Глуску. Аўтар яго невядомы. Фота даўно “гуляе” па сацыяльных сетках ды сайтах. На здымку добра відаць, што цэнтральная вуліца Глуска ў гэты час яшчэ не асфальтаваная, паабапал дарогі няма тратуараў. Глускія старажылы ўспамінаюць, што восенню, калі ішлі дажджы, і вясной, калі раставаў снег, вуліцы нашага мястэчка ператвараліся амаль у балота. На вуліцы Кірава, каб вада сыходзіла, уздоўж дарогі былі пракапаныя канавы. У канцы 1950-х гадоў, калі пачалі добраўпарадкоўваць вуліцу, канавы засыпалі і закладвалі цаглінамі. Як раз у гэты час разбурылі і разбіралі на будматэрыялы глускую турму (былую турму НКУС). Як успамінае адзін са старэйшых жыхароў Глуска Аляксандр Фёдаравіч Язылец, ён, у той час яшчэ школьнік, удзельнічаў у гэтым працэсе — грузіў цэглу з турмы на “палутарку” (грузавая машына ГАЗ-ММ), калі падзарабляў грузчыкам падчас канікул. Так што будматэрыялы для будучай дарогі па вуліцы Кірава былі, можна сказаць, з гісторыяй.
На фотакартцы на першым плане стаяць два хлапчукі. Магчыма, хтосьці з чытачоў іх пазнае? Ды і ўвогуле на здымку шмат дзяцей. На дарозе ў той час не было такога інтэнсіўнага руху, як зараз. Таму і дзеці сябе каля самай праезнай часткі адчувалі больш-менш у бяспецы, ды і вуліцу глушчане пераходзілі не па скрыжаванні ды не па пешаходным пераходзе, а як каму зручней.
Па гістарычных мерках 51 год — гэта вельмі мала. Але жыццё ідзе, усё мяняецца і развіваецца вельмі хутка. Паглядзіце, як змяніўся наш Глуск за гэты час, параўнайце.
В. ЯНУШЭЎСКАЯ
Фота з сайта gluskonline.net