Новая выстаўка «Завуся я толькі — Янка Купала», прысвечаная 135-годдзю з дня нараджэння народнага паэта Беларусі Янкі Купалы, адкрылася ў Глускім раённым гісторыка-краязнаўчым музеі.
На выстаўцы прадстаўлены асабістыя рэчы паэта, творы класіка беларускай літаратуры, медалі, выпушчаныя з нагоды 100-годдзя з дня нараджэння Купалы. Ёсць там і ксеракопія старонкі газеты «Северо-Западный край» ад 15 мая 1905 года з першым надрукаваным вершам паэта «Мужык». Таксама ў музеі можна ўбачыць ілюстрацыі Васіля Шаранговіча і Міхаіла Басалыгі да паэм Янкі Купалы.
Выстаўка арганізавана пры дапамозе Дзяржаўнага літаратурнага музея Янкі Купалы, яна будзе працаваць да 22 снежня.
Алена ЗМІТРОВІЧ
