Думаю, не памылюся, калі скажу, што пры словах “капітальны рамонт” у многіх мяняецца выраз твару з ціхамірнага на заклапочаны. І не важна, рамантуеш ты сваё жыллё або капітальнага рамонту нарэшце прычакаў шматкватэрны дом, дзе ты маеш жылыя метры. У абодвух выпадках не пазбегнуць пылу, мітусні і некаторай бытавой неўладкаванасці. Але калі ўласны рамонт можна пачаць і не скончыць, а проста спыніць (праз год ці болей), то для так званага жыллёвага фонду тэрміны правядзення капрамонтаў абмяжоўваюцца трыма з паловай — чатырма з паловай месяцамі. Ёсць і дакладны пералік работ, якія выконваюцца без унясення дадатковай аплаты з боку жыхароў, і тых, што могуць быць выкананы за кошт уласнікаў жылых памяшканняў і пры іх жаданні. У прыватнасці, да такіх дадатковых работ адносяцца замена і рамонт электрычнага, газавага, санітарна-тэхнічнага і іншага абсталявання; устаноўка, замена і рамонт прыбораў уліку расходу вады, цеплавой і электрычнай энергіі, газу, у тым ліку тых, што знаходзяцца ў дапаможных памяшканнях; абслугоўванне ўнутрыкватэрнай электраправодкі. Асабліва трэба зазначыць, што ў адпаведнасці з дзеючым заканадаўствам замена вокнаў у кватэрах не ўваходзіць у пералік работ пры капітальным рамонце жыллёвага фонду. Дарэчы, работы па абсталяванні жылых дамоў новымі відамі добраўпарадкавання, скажам, сістэмамі халоднага і гарачага водазабеспячэння, каналізацыяй, газазабеспячэннем і іншымі, адносяцца да мадэрнізацыі будынкаў і збудаванняў, а ў спіс работ, прадугледжаных капрамонтам, не ўваходзяць, патлумачыў рэдакцыі галоўны інжынер Глускага УКП “Жылкамгас” Аляксандр Лугін. Яно і зразумела: пры капрамонце рамантуецца тое, што было ў доме, а з’яўленне новых сістэм і выгод — гэта ўжо мадэрнізацыя. Зрэшты, спіс работ, якія адносяцца да капітальнага рамонту, зацверджаны пастановай Савета Міністраў Рэспублікі Беларусь № 324 ад 21.04.2016.
Аднак вернемся да капітальнага рамонту, таго, што быў праведзены ў гэтым годзе ў жыллёвым фондзе Глуска мясцовым “Жылкамгасам”. Першы адрас — Кірава, 95. Тут, як пазначыў Аляксандр Лугін, заменены дах, уцеплены тарцовыя сцены фасада, дэманціраваны старыя і ўстаноўлены новыя балконы з казыркамі, заменены проціпажарныя люкі і люкі на гарышча. У пад’ездах камунальнікі паставілі вокны ПВХ уласнай вытворчасці і металічныя дзверы, на вуліцы зроблена новая адмостка. Усе работы, падкрэслівае галоўны інжынер “Жылкамгаса”, выкананы сіламі прадпрыемства, на іх правядзенне выкарыстана 151,1 тысячы рублёў, гэта бюджэтныя сродкі (59,1 тысячы рублёў) і адлічэнні ўласнікаў памяшканняў (92 тысячы рублёў). У выніку стары і не надта адметны па сваіх архітэктурных характарыстыках двухпавярховы дом набыў даволі прывабны вонкавы выгляд і, хочацца верыць, стаў больш зручным і прыемным для пражывання.
Прычакаў свайго капітальнага рамонту і дом па вуліцы Кірава пад нумарам 13. Тут у адпаведнасці з праектна-каштарыснай дакументацыяй камунальнікі замянілі дах, уцяплілі тарцовыя сцены фасада, на лесвічных пляцоўках паставілі вокны ПВХ і новыя дзверы ў пад’ездах, акрамя таго, адрамантавалі сістэму ацяплення на першым паверсе і замянілі групавыя прыборы ўліку цяпла і вады. План рамонту па кожным доме фарміруецца асобна, пат-лумачыў Аляксандр Лугін, у залежнасці ад існуючых у ім праблем, але з улікам агульнага спіса тыповых работ. Скажам, зараз актыўна вядзецца рамонт у доме № 22, таксама па вуліцы Кірава. Тут, акрамя залівання новай адмосткі, уцяплення тарцоў, замены ў пад’ездах старых вокнаў на ПВХ і дзвярэй на новыя з кодавымі замкамі, акрамя ўстаноўкі новых балконаў з казыркамі і казыркоў над уваходамі, праводзіцца замена міжпакаёвых і часткова міжкватэрных перагародак, мяняецца ўнутрыдамавая сістэма водазабеспячэння і каналізацыі. Гэтыя работы, падкрэслівае Аляксандр Лугін, патрэбна выканаць у бягучым годзе, у наступным — будзе зроблены новы дах, і капітальны рамонт дома № 22 завершыцца.
Што датычыць планаў на будучае, то трэба сказаць, што перспектыўная праграма і бягучы графік капітальнага рамонту жыллёвага фонду зацвярджаецца раённым выканаўчым камітэтам, яны павінны быць апублікаваны ў газеце, а таксама размешчаны на сайце райвыканкама. А значыць, наступныя адрасы капітальных рамонтаў стануць вядомы ў пачатку наступнага года.
Т. ЛУКАШЭВІЧ
Фота С. РУДЗІНСКАГА
