На днях на бульвары Грахоўскага ў райцэнтры з’явілася навагодняя прыгажуня-елка. Прывезлі яе з Завалочыцкага лясніцтва, паведамілі нам у Глускім лясгасе, а ўстанавілі і аздобілі работнікі мясцовага “Жылкамгаса”. Дарэчы, згодна з распараджэннем старшыні райвыканкама, святочныя елкі да 10 снежня павінны з’явіцца і ў аграгарадках раёна.
Гэта елкі, так бы мовіць, агульныя, грамадскія. Але ў кожнай арганізацыі напярэдадні Новага года імкнуцца ўпрыгожыць свае рабочыя месцы і тэрыторыю як мага лепш. Прынамсі, некаторыя з гэтых устаноў, акрамя святочнага настрою, могуць атрымаць яшчэ і прыемны матэрыяльны бонус. Штогод у раёне праводзіцца конкурс на лепшае навагодняе афармленне сярод прадпрыемстваў, арганізацый і ўстаноў Глускага раёна. У гэты раз, паведаміў рэдакцыі выконваючы абавязкі начальніка аддзела архітэктуры і будаўніцтва райвыканкама Аляксандр Гваздзяроў, спецыяльна створаная камісія пачне агляд 22 снежня і закончыць сваю працу 8 студзеня, канчатковыя вынікі будуць падведзены да 15 студзеня. Пераможцаў конкурсу на лепшае навагодняе афармленне вызначаць асобна сярод прадпрыемстваў, арганізацый і ўстаноў райцэнтра і сельскай мясцовасці, яны атрымаюць прэміі: за 1-е месца — 10 базавых велічынь, за 2-е — 7, за 3-е — 5 базавых велічынь.
