Ёлкі, святы, падарункі

З 20 па 30 снежня ва ўсіх школах і дзіцячых садках раёна пройдуць навагоднія ранішнікі, а святочныя навагоднія сустрэчы ў рамках дабрачыннай акцыі “Нашы дзеці” з удзелам кіраўніцтва раёна і структурных падраздзяленняў райвыканкама запланавана правесці, пачынаючы з 21 снежня. У прыватнасці, 22 снежня пройдзе дзіцячы ранішнік у Цэнтры карэкцыйна-развіваючага навучання і рэабілітацыі, на 5 студзеня намечана правядзенне раённай дабрачыннай ёлкі. На яе будуць запрошаны дзеці-сіроты і тыя, што засталіся без бацькоўскай апекі, дзеці з інваліднасцю, хлопчыкі і дзяўчынкі ад 8 да 14 гадоў з мнагадзетных і малазабяспечаных сем’яў, а таксама пераможцы раённых алімпіяд, творчых конкурсаў і спартыўных спаборніцтваў. Падарункі да Новага года (за кошт сродкаў раённага бюджэту) атрымаюць таксама вучні з 1-га па 4-ы класы ўсіх школ і выхаванцы дзіцячых садкоў раёна. Не застануцца без салодкіх пачастункаў і тыя дзеткі, каму не пашанцуе захварэць пад Новы год: 30 снежня падарункі атрымаюць маленькія пацыенты стацыянара раённай бальніцы. Усё гэта прадугледжана рашэннем Глускага раённага выканаўчага камітэта “Аб арганізацыі раённай дабрачыннай ёлкі”. Там жа запісаны рэкамендацыі арганізацыям і грамадскім аб’яднанням раёна прыняць удзел у дабрачыннай акцыі “Нашы дзеці”.