Добрая навіна прыйшла на мінулым тыдні: у абласным этапе рэспубліканскага маладзёжнага конкурсу “100 ідэй для Беларусі” адной з самых перспектыўных і цікавых распрацовак экспертны савет прызнаў ідэю дзевяцікласніка гімназіі Глуска Дзмітрыя Трыбуша “Выкарыстанне актыўнага ілу ў гаспадарцы”.

З трохсот праектаў, якія былі прадстаўлены на рэгіянальных (гарадскіх і раённых) этапах, да абласнога дайшлі толькі 30 — самыя лепшыя. Гэта ідэя пясочнай тэрапіі для заняткаў з дзецьмі, кафэ з экалагічна чыстай ежай, гульня “Мафія” па-беларуску, мабільны дадатак для пошуку людзей і іншыя. З гэтых распрацовак журы адабрала 11, якія  будуць удзельнічаць у фінале конкурсу, сярод іх і работа Дзмітрыя Трыбуша “Выкарыстанне актыўнага ілу ў гаспадарцы”, падрыхтаваная ім пад кіраўніцтвам педагога Таццяны Сачанкі. Яны даказалі, што актыўны іл можна прымяняць у якасці  ўдабрэння і ў якасці альтэрнатыўнага паліва. Акрамя гэтага, гімназіст звярнуў увагу і на экалагічны складнік свайго праекта. Глуск знаходзіцца на правым беразе ракі Пціч, гарадскія біялагічныя ачышчальныя збудаванні размешчаны паблізу рэчкі. Асадкі сцёкавых вод, якія назбіраліся за шмат гадоў, могуць забрудзіць глебу, грунтовыя воды і нават раку.

 Конкурс “100 ідэй для Беларусі” праводзіцца ў краіне з 2011 года. Яго пераможцы маюць магчымасць атрымаць грант на рэалізацыю сваіх ідэй, а таксама прадставіць Беларусь на міжнародным конкурсе “100 ідэй для СНД”, атрымаць рэкамендацыю для паступлення ў профільную ВНУ або курс навучання пры Нацыянальнай акадэміі навук.