Рабочая група па ўрэгуляванні пытанняў аўтаперавозак будзе створана пры Магілёўскім аблвыканкаме. Такое рашэнне прынята на абласным пасяджэнні грамадска-кансультатыўнага савета па развіцці прадпрымальніцтва, якое прайшло 6 сакавіка ў Магілёве. На сустрэчы прысутнічалі старшыня аблвыканкама Уладзімір Даманеўскі, прадстаўнікі бізнес-супольнасці, некаторых міністэрстваў і ведамстваў, кіраўнікі структурных падраздзяленняў аблвыканкама, а таксама раённых выканаўчых камітэтаў — у студыях, паколькі пасяджэнне праходзіла ў рэжыме відэаканферэнцыі. Ад Глускага раёна ў пасяджэнні грамадска-кансультатыўнага савета ўдзел прынялі першы намеснік старшыні райвыканкама Алена Булатоўская, намеснік старшыні райвыканкама Аляксандр Анцюшэня, кіраўнікі падатковай, прыродаахоўнай, санітарнай службаў, прадстаўнікі аддзела па надзвычайных сітуацыях, а таксама суб’ектаў малога бізнесу. Найбольш часу спатрэбілася на абмеркаванне пытання па аўтаперавозках, паколькі праблема закранае інтарэсы не толькі саміх перавозчыкаў, але і шматлікую армію спажыўцоў гэтых паслуг. Усе пагадзіліся, што пасля ўступлення ў сілу закона “Аб аўтамабільных перавозках” адкрытых пытанняў па гэтай тэме яшчэ хапае, таму і патрэбна наладзіць дыялог з удзелам зацікаўленых бакоў, каб прааналізаваць сітуацыю ў вобласці і выпрацаваць пэўныя прапановы. Старшыня аблвыканкама Уладзімір Даманеўскі звярнуў увагу на тое, што патрэбна прыняць такое рашэнне, якое дапаможа зняць усе спрэчныя моманты і абараніць інтарэсы і перавозчыкаў, у тым ліку маршрутчыкаў, і спажыўцоў паслугі.

У ходзе абмеркавання таксама былі разгледжаны пытанні, якія датычыліся змен у розных галінах гаспадарання пасля ўступлення ў сілу Дэкрэта № 7 “Аб развіцці прадпрымальніцтва”, у тым ліку ў галіне будаўніцтва, гандлю, грамадскага харчавання і аказання бытавых паслуг, а таксама патрабаванняў міністэрства па надзвычайных сітуацыях. Ад кіраўніка фонду “Магілёўаблмаёмасць” прагучала прапанова, каб на месцах раённая ўлада больш актыўна перадавала бізнесу пустуючыя памяшканні для рэалізацыі прапаноўваемых праектаў. У работу па падтрымцы і папулярызацыі  малога бізнесу губернатар Уладзімір Даманеўскі прапанаваў уключыцца і сродкам масавай інфармацыі — праз стварэнне матэрыялаў пра паспяховыя ініцыятывы прадпрымальнікаў на месцах.

Пра гатоўнасць аператыўна вырашаць тыя ці іншыя пытанні, абмяркоўваць новыя бізнес-прапановы заявіла і першы намеснік старшыні райвыканкама Алена Булатоўская пры размове ўдзельнікаў відэаканферэнцыі ў Глускім раёне. Яны дамовіліся, што кожны чацвер першы намеснік старшыні райвыканкама па пытаннях эканомікі будзе выдзяляць час, з 10 да 12 гадзін, менавіта для  сустрэч з прадпрымальнікамі.

Т. ЛУГАВАЯ