Шчырыя віншаванні, словы падзякі за мірнае жыццё, традыцыйныя чырвоныя гваздзікі і падарункі… Напярэдадні Дня Перамогі намеснік старшыні Глускага раённага выканаўчага камітэта Дзмітрый Цімчанка, начальнік упраўлення па працы, занятасці і сацыяльнай абароне насельніцтва Алена Кірэй і старшыня раённага савета ветэранаў Валерый Сураўнёў сардэчна віншавалі ветэранаў Вялікай Айчыннай вайны. Сёння ў раёне іх засталося ўсяго дзесяць. На жаль, па стане здароўя ветэраны не змаглі прысутнічаць на ўра-чыстым святкаванні 9 мая, таму кожнага з іх у перадсвяточныя дні наведалі дома.

У панядзелак, 7 мая, завітаўшым гасцям былі рады Валянціна Васільеўна Зайцава, Марыя Іванаўна Галамака, Ніна Уладзіміраўна Кульба, Соф’я Антонаўна Пятрова, Мікалай Дзмітрыевіч Зянькоўскі, Уладзімір Мікалаевіч Лысак і Васіль Антонавіч Глаз. На наступны дзень віншаванні прымалі Іван Паўлавіч Прыгара і Яўген Цімафеевіч Шылаў. Падарункі былі перададзены і Васілю Уладзіміравічу Курсу, зараз ён пражывае ў сваякоў у Гродзенскай вобласці.

Ад імя раённай улады Дзмітрый Цімчанка шчыра віншаваў ветэранаў з надыходзячым святам, жадаў ім моцнага здароўя, бадзёрасці, дабрабыту, уручаў кветкі і падарункі. “Мы ўдзячны вам за сённяшні мірны дзень, за Вялікую Перамогу!” — звяртаўся ён да пажылых людзей. Да яго віншаванняў і цёплых слоў падзякі далучаліся таксама Алена Кірэй і Валерый Сураўнёў. Дарэчы, у гэтыя дні заслужаныя землякі атрымалі і матэрыяльную дапамогу ад прад-прыемстваў, дзе раней працавалі. Ветэраны шчыра дзякавалі за падарункі, клопат і ўвагу, даставалі свае ўзнагароды і фотаздымкі, дзяліліся ўспамінамі аб ваенным часе, гаварылі пра надзённае, а на развітанне жадалі толькі аднаго: каб ніколі больш не было вайны.

Дзякуй вам, паважаныя ветэраны, за мірнае сёння! Мы памятаем! Мы ганарымся!

Ганна АЎТУХОВА

Фота аўтара

Больш фота глядзіце тут