Зламаная агароджа каля артэзіянскай свідравіны
У мінулы аўторак, 12 чэрвеня, рэйдавая група ў складзе начальніка Глускай раённай інспекцыі прыродных рэсурсаў і аховы навакольнага асяроддзя Леаніда Васілеўскага, выконваючага абавязкі галоўнага санітарнага ўрача раёна Паўла Гутарава і начальніка аддзела землеўпарадкавання райвыканкама Вячаслава Асташэвіча накіравалася ў чарговы рэйд па праверцы санітарнага стану і парадку тэрыторый населеных пунктаў раёна. На гэты раз у поле зроку ўдзельнікаў рэйду трапіла пяць вёсак Калаціцкага сельсавета і сам аграгарадок, таму невыпадкова да камісіі далучыўся старшыня мясцовага сельвыканкама Андрэй Баброўнік.
Першым населеным пунктам на шляху рэйдавай групы стаў аграгарадок Калацічы. Дагледжаныя дворыкі і дамы, упарадкаваныя агароды, акуратна складзенае ў мяхі і падрыхтаванае да вывазу смецце, пустазелле скошана… Большасці жыхароў не трэба тлумачыць, што рабіць: яны разумеюць, што падтрымліваць парадак каля сваёй хаты — іх абавязак. Аднак агульны пазітыўны малюнак у Калацічах сапсавала куча смецця і галін недалёка ад аднаго з домаўладанняў па вуліцы Паўднёвай. Узялі на заметку ўдзельнікі рэйду і неабкошаную пляцоўку для другаснай сыравіны, яна знаходзіцца на балансе “Жылкамгаса”.
Складзіраваць будматэрыялы і дровы на вуліцы можна не болей за трое сутак. Вёска Бабірова
Едзем далей… Барысаўшчына. Радуюць вока падвор’і, дзе жывуць людзі і падтрымліваюць вакол чысціню і парадак. Аднак дзе-нідзе трапляюцца пустуючыя дамы, зарослыя бур’янам, з пахіленымі платамі. Ёсць над чым працаваць у далейшым, заўважае старшыня сельсавета. Прычым не толькі сельскай уладзе: бачым зламаную агароджу каля артэзіянскай свідравіны, што належыць камунальнай службе. Гэту заўвагу тут жа заносяць у блакнот.
У вёску Жалвінец на лета прыязджае шмат дачнікаў, яны таксама стараюцца даглядаць свае прысядзібныя тэрыторыі. Аднаго з мясцовых жыхароў хвалявала пытанне рамонту верхняй часткі калодзежа, што каля яго двара. Удзельнікі рэйду растлумачылі, што калодзеж перададзены на баланс “Жылкамгаса”. Аднак гаспадар ра-зам з суседзямі згодны прыкласці руку да рамонту, быў бы толькі будматэрыял… Такая пазіцыя вяскоўцаў выклікае павагу, чаго не скажаш пра некаторых жыхароў Макавіч: тут агульны выгляд вуліц псавалі кучы галін, якія людзі павыносілі са сваіх агародаў і кінулі куды ім уздумаецца.
Калаціцкі сельсавет налічвае 15 населеных пунктаў, і аб’ехаць іх за раз не было магчымасці. Работа рэйдавай групы працягнецца. У цэлым убачанае падчас паездкі пакінула больш станоўчых уражанняў, і ёсць надзея, што адрасоў безгаспадарчасці і бяздзейнасці стане менш.
Ганна АЎТУХОВА
Фота аўтара
