Спартыўныя мерапрыемствы, што прайшлі ў Глуску ў Дзень Рэспублікі, магчыма, не назавеш урачыстай часткай гэтага святочнага дня, але тое, што ўсе яны былі прысвечаны святу і спрыялі стварэнню святочнага настрою, сумненню не падлягае. Каб пераканацца ў гэтым, дастаткова было 3 ліпеня прыйсці на цэнтральны стадыён Глуска — там не пуставала ні адна пляцоўка. На вялікім футбольным полі адбыўся матч паміж вучнёўскімі камандамі першай і другой школ райцэнтра, і дарма што сустрэча называлася таварыскай — барацьба за перамогу вялася ўпартая і цікавая, саступаць не хацеў ніхто. Ніхто і не саступіў: гульня завяршылася з лікам 2:2, у якасці ўзнагароды і падзякі каманды атрымалі салодкія падарункі ад аддзела адукацыі, спорту і турызму.

На валейбольнай пляцоўцы сіламі мераліся чатыры дзявочыя каманды, гульні праходзілі па кругавой сістэме. У выніку званне мацнейшых заваявалі школьніцы з Заеліцкага навучальна-педагагічнага комплексу, за імі ідуць валейбалісткі СШ № 2, СШ № 1 і гімназіі.

Цікава было назіраць за гульнёй нашых гандбалістаў. Таварыскую сустрэчу выхаванцы аддзялення гандбола мясцовай дзіцяча-юнацкай спартшколы правялі паміж сабой, таму для іх важнай была не перамога адной з каманд, а магчымасць яшчэ раз патрэніравацца разам, адтачыць свае ўменні і навыкі ў гульні з роўным па сіле сапернікам. І яны гэта зрабілі.

Толькі на час правядзення спартландыі сапернікамі сталі сябры, хлопчыкі і дзяўчынкі, што зараз адпачываюць у аздараўленчым лагеры “Гарадок”: раздзяліўшыся на дзве каманды, яны этап за этапам праходзілі ўсе выпрабаванні гэтага вясёлага спартыўнага мерапрыемства. За старанне і актыўны ўдзел у спартландыі аддзел адукацыі, спорту і турызму ўзнагародзіў дзяцей смачнымі тортамі.

Таварыскай была і апошняя спартыўная сустрэча гэтага дня — матч па футболе паміж зборнымі камандамі Глуска і Бабруйскага камбіната хлебапрадуктаў. Нямала глушчан сабралася, каб падтрымаць землякоў, і, трэба сказаць, нашы футбалісты не падвялі чаканні сваіх балельшчыкаў: у вароты сапернікаў яны забілі шэсць мячоў, самі прапусцілі адзін гол. Ці трэба казаць, што такі зыход парадаваў і нашых гульцоў, і тых, хто іх падтрымліваў на трыбунах. Што да суседзяў-бабруйчан, то будзем спадзявацца, што яны вярнуліся дадому не з крыўдай, а з новым вопытам, бо, як вядома, адмоўны вынік таксама вынік.

Т. ЛУГАВАЯ

Фота аўтара