На маё пытанне, чаму, замест таго, каб проста добра выспацца і адпачыць ад усялякіх заняткаў, вы летам ходзіце ў школу, каб папрацаваць, дзяўчаты ледзь не ў адзін голас сказалі, што зарабляць уласнай працай і мець свае грошы — гэта таксама вельмі крута, а глядзець, як іх табе адлічваюць, атрымліваць іх, распісвацца ў ведамасці насупраць свайго прозвішча — дадатковае задавальненне.

Школьная брыгада па пашыве пасцельнай бялізны і азеляненні тэрыторыі створана і працуе зараз пры гімназіі Глуска. Сюды ўваходзяць 30 чалавек, у асноўным дзяўчаты, хлопцаў толькі трое, яны займаюцца азеляненнем і добраўпарад-каваннем тэрыторыі, а дзяўчаты шыюць — швейным цэхам для іх на нейкі час стаў кабінет абслугоўваючай працы. Шыюць яны вафельныя ручнікі і пасцельную бялізну для дзіцячых садкоў і школ раёна.

Дзяўчаты рознага ўзросту працуюць у розных брыгадах, паколькі менавіта ад узросту залежыць працягласць і працоў-нага дня, і ўсёй працоўнай змены. Так, школьніцы ад 14 да 16 гадоў працуюць 10 дзён па 4 гадзіны 36 хвілін, старшая група швачак, ад 16 да 18 гадоў, штодня працуе 7 гадзін з перапынкам на абед, іх працоўная змена доўжыцца 13 дзён, да 16 ліпеня.

Работа для дзяўчат знаёмая, растлумачыла нам настаўніца абслугоўваючай працы гімназіі Аксана Грыгор’ева (працуе з дзяўчатамі па зменах разам з настаўніцай Марынай Грынявецкай). Усе неабходныя для пашыву бялізны швы яны вывучаюць у 9-м класе і для замацавання пройдзенага потым шыюць сабе пасцельную бялізну, так што да такой работы яны падрыхтаваныя. Ды і старанныя, хваліць сваіх вучаніц настаўніца, робяць усё добра, акуратна. Пры фарміраванні брыгады недахопу ў ахвотных не было, школьніцы насамрэч матываваныя да таго, каб зарабіць свае ўласныя грошы. Што да адпачынку, то для яго часу яшчэ хопіць, упэўнены дзяўчаты. А калі ў кішэні звіняць заробленыя табой манеты, адпачынак яшчэ больш прыемны і праходзіць яшчэ больш весела. І з гэтым цяжка не пагадзіцца.

Каментарый спецыяліста: Алена КІРЭЙ: начальнік упраўлення па працы, занятасці і сацыяльнай абароне Глускага райвыканкама:

— Арганізацыяй часовай занятасці моладзі ў вольны ад вучобы час займаецца ўпраўленне па працы, занятасці і сацыяльнай абароне сумесна з аддзелам па адукацыі, спорце і турызме райвыканкама. Фінансаванне работ ідзе са сродкаў бюджэту дзяр-жаўнага пазабюджэтнага фонду сацыяльнай абароны на-сельніцтва. На набыццё неабходных матэрыялаў ужо патрачана 17 тысяч 300 рублёў. Усяго ж на занятасць школьнікаў выдзелена 36 тысяч 947 рублёў. Сяголета часовай занятасцю ў вольны час ахоплена 80 школьнікаў з СШ № 1, СШ № 2 і гімназіі, брыгады займаюцца пашывам вырабаў і азеляненнем тэрыторый.

Таццяна ЛУКАШЭВІЧ

Фота аўтара