З нацыянальным каларытам

Пераможцай моладзевага рэспубліканскага фотаконкурсу “Селфі&фота з вышыванкай” у намінацыі “Фота закаханых у вышыванцы” стала глушчанка Яўгенія Хамчаноўская. Творчае спаборніцтва з нацыянальным каларытам у рамках праекта “Беларусь — крыніца натхнення” па традыцыі праводзіў Беларускі рэспубліканскі саюз моладзі.

З 15 па 20 чэрвеня ўдзельнікі раённага этапу фотаконкурсу — навучэнцы, працоўная моладзь, актывісты БРСМ, — размяшчалі ў групе “Моладзь Глушчыны” сацыяльных сетак “ВКонтакте” і Instagram аматарскія і прафесійныя фотаздымкі закаханых, дзяўчат, хлопцаў у адзенні з нацыянальным беларускім арнаментам. Раённы камітэт ГА “БРСМ” вызначыў лепшыя фотаработы для ўдзелу ў абласным этапе конкурсу. Па яго выніках фотаздымак вясельна-сямейнага фатографа Яўгеніі Хамчаноўскай працягнуў удзел у рэспубліканскім туры і ў сваёй намінацыі стаў лепшым.

Падчас маштабнага свята “Дзень вышыванкі”, якое разгарнулася 2 ліпеня на пляцоўцы каля сталічнага Палаца спорту, наша зямлячка была ўзнагароджана дыпломам пераможцы.

“Прыемна ўсведамляць, што сёння нацыянальны арнамент набывае папулярнасць сярод моладзі, усё часцей выкарыстоўваецца ў афармленні адзення, прадметаў побыту, — адзначае першы сакратар райкама ГА “БРСМ” Юлія Стаўская. — Фотаконкурс, які накіраваны на захаванне спрадвечных народных традыцый, у чарговы раз даказаў, што вышыванка ў нашы дні — гэта патрыятычна, модна і вельмі прыгожа”.

Ганна АЎТУХОВА

Фота прадастаўлена Глускім раённым камітэтам ГА “БРСМ”