З планавых 7 488 гектараў зерневых і зернебабовых культур на раніцу 13 жніўня яны былі абмалочаны на 5 716 гектарах, або на 76 працэнтах пасеяных плошчаў. Па-ранейшаму лідарства па тэмпах работ трымае аграфірма “Слаўгарадскі”, і гэта зразумела: менавіта тут найбольшыя плошчы зерневых і зернебабовых культур — 1 737 гектараў, з іх  1 533 ужо зжаты, гэта 88 працэнтаў ад неабходнага. На 78 працэнтах плошчаў правялі жніво ў эксбазе “Глуск”, на 77 працэнтах — у “Турыно-агра” і на 76 — у “Зары Камуны”. Найбольшыя плошчы застаецца ўбраць “Глускай Зары” (404 га) і райаграпрамтэхзабеспячэнню (387 га).

Калі параўнаць гэтую сітуацыю на палях з тым, што было ў мінулым годзе, то сяголета ўборка ідзе больш хуткімі тэмпамі: 5 716 гектараў супраць 4 340 леташніх, але з гэтай плошчы было намалочана больш за 10 100 тон зерня, сяголетні ж намалот больш сціплы — 9 351 тона. На круг у сярэднім па раёне выходзіць 16,4 цэнтнера, перавышаюць гэты паказчык у РАПТЗ (18,2), “Турыно-агра” (17,5) і “Глускай Зары” (17,2).

У разрэзе асобных культур у раёне ўбрана: 1 642 гектары трыцікале (намалочана 2 668 тон зерня), 2 025 гектараў азімага жыта (намалочана 3 224 тоны), 923 гектары ячменю (намалочана 1 470 тон), 701 гектар аўса (намалочана 1 189  тон), 389 гектараў зернебабовых (намалочана 707 тон) і 36 гектараў пшаніцы, з якіх намалацілі 93 тоны, гэту культуру ў раёне вырошчваюць толькі ў райаграпрамтэхзабеспячэнні.

Прадаўжаецца корманарыхтоўка: у цэлым па раёне скасілі 2 004 гектары траў другім укосам (45 працэнтаў да патрэбнага), нарыхтавалі 2 835 тон сена (49 працэнтаў да плана), 29 435 тон сенажу (49 працэнтаў да плана) і 3 717 тон зернесенажу, на ўмоўную галаву нарыхтавана 9,38 цэнтнера кармавых адзінак. Найбольшы запас кармоў для грамадскага статка маецца ў РАПТЗ — 15,24 цэнтнера кармавых адзінак.