Перавёз больш за тысячу тон збожжа
Кожная сустрэча з такімі людзьмі, як вадзіцель з райаграпрамтэхзабеспячэння Анатоль Ахрэмчык, пакідае ў душы добрае ўражанне. Помніцца мінулы год, калі віншавалі яго як вадзіцеля-тысячніка: гучалі цёплыя словы, уручаліся падарункі, самадзейныя артысты спявалі песні.
І вось у сяголетняе жніво зноў усё паўтарылася. Праўда, не ў разгар уборачнай, а на яе заканчэнні. Анатоль Ахрэмчык стаў другім вадзіцелем-тысячнікам у раёне: ён на МАЗе перавёз 1 040 тон збожжа. З гэтай нагоды ў райаграпрамтэхзабеспячэнне прыехалі намеснік старшыні райвыканкама Дзмітрый Цімчанка, старшыня раённага аб’яднання прафсаюзаў Аляксандр Леўчанка і старшыня райкама прафсаюза работнікаў АПК Віктар Лугін, падышлі калегі-механізатары. Пад цёплыя апладысменты сабраўшыхся на мехдвары Анатолю Іванавічу за добрасумленную, самаадданую працу і паспяховае пераадоленне тысячнага рубяжа на адвозцы збожжа былі ўручаны падзячнае пісьмо райвыканкама, падзяка ад райкама прафсаюза і падарунак ад Федэрацыі прафсаюзаў Беларусі, а яшчэ прэмія і кветкі. А потым былі песні ў выкананні народнага аматарскага аб’яднання “Зносіны”.
Мы таксама шчыра радаваліся за Анатоля Ахрэмчыка, яго можна назваць сапраўдным героем жніва. Бо ў гэтым годзе яно было няпростым, і любое дасягненне можна ўспрымаць як перамогу. Дарэчы, шчыра, сумленна працаваць для гэтага чалавека норма. Яшчэ ў маладосці ён станавіўся пераможцам сацыялістычнага спаборніцтва і атрымліваў званне “Лепшы малады работнік”, было гэта двойчы, у 1988 і 1989 годзе.
Вольга ЧУЧВАЛ
Фота Ганны АЎТУХОВАЙ