Сёння спаўняецца 105 год з дня нараджэння паэта, празаіка, публіцыста Сяргея Іванавіча Грахоўскага. Яго дзяцінства прайшло на Глушчыне, і сюды ж ён вяртаўся зноў і зноў, як толькі выпадала магчымасць. Многія даведаліся пра мястэчка Глуск дзякуючы Сяргею Грахоўскаму: яго элегія “Мястэчка… мястэчка” прасякнута шчымлівай любоўю да роднага кута. На долю паэта выпала шмат выпрабаванняў, амаль дваццаць гадоў адабралі сталінскія канцлагеры, але Сяргей Іванавіч знайшоў у сабе сілы вярнуцца не толькі да звычайнага жыцця, але і ў літаратуру, актыўна займаўся грамадскай працай.
Імя ганаровага грамадзяніна Глуска Сяргея Грахоўскага на гэтым тыдні ўспомняць у мясцовых школах, бібліятэках, дзіцячых садках, дзе пройдуць тэматычныя класныя гадзіны, выставы. Творчая імпрэза “Урокі Грахоўскага” з нагоды 105-годдзя знакамітага земляка ў бліжэйшую пятніцу адбудзецца ў Глускай сярэдняй школе № 1, якая носіць імя Сяргея Іванавіча. На сустрэчу запрошаны сваякі паэта, прадстаўнікі творчай інтэлігенцыі, дзеячы культуры Беларусі.
