Гумарыстычным музычна-тэатралізаваным папуры пра работу камунальнай службы пачаўся святочны сход працоўнага калектыву Глускага ўнітарна-камунальнага прадпрыемства “Жылкамгас”. Такі сход традыцыйна прайшоў напярэдадні Дня работнікаў бытавога абслугоўвання і жыллёва-камунальнай гаспадаркі і традыцыйна быў падрыхтаваны сваімі сіламі, бо амаль усе, хто выходзіў на сцэну, — таленты, выхаваныя ў сваім калектыве. Дасціпныя жарты, нумары і шчырае выкананне самадзейных артыстаў не пакідалі гледачоў раўнадушнымі і не давалі ім сумаваць. Ды і як магло быць інакш, калі справу кантралявала строгая, прынцыповая і пры гэтым вельмі таленавітая Серафіма Іванаўна Агурцова?! (Ці не сваячка яна Агурцову з “Карнавальнай ночы”?) Вось ужо і нагледзеліся, і наслухаліся, і насмяяліся.

Паколькі сход гэты святочны, то, выступаючы перад калегамі, дырэктар прадпрыемства Юрый Дымша не стаў называць лічбаў, паказчыкаў і падводзіць вынікі — усё гэта зроблена і падлічана ў рабочым парадку. Ён падзякаваў калектыву, усім камунальнікам, што з пастаўленымі задачамі яны справіліся: давалі цяпло і ваду, чысцілі дарогі ад снегу і падмяталі вуліцы, словам, рабілі ўсё, што патрэбна, па зададзеным сабекошце, больш таго — спрацавалі з рэнтабельнасцю, вышэйшай, чым была запланавана. На новы перыяд перад прадпрыемствам стаяць яшчэ больш вялікія планы і задачы, і Юрый Дымша выказаў упэўненасць, што калектыў з імі справіцца. Зачытаўшы віншавальны зварот ад Прэзідэнта Рэспублікі Беларусь, ад сябе асабіста ён пажадаў усім работнікам камунальнай і бытавой службаў раёна здароўя, дабрабыту ў сем’ях і годнай зарплаты. Сваю згоду з такімі пажаданнямі гледачы выказалі апладысментамі. Дружнымі воплескамі падтрымалі яны і сваіх калег, адзначаных рознымі ўзнагародамі. Грамату Міністэрства жыллёва-камунальнай гаспадаркі атрымала спецыяліст па разліках з насельніцтвам Анжаліка Корабава. Граматы УКП “Жылкамгас” былі ўручаны цесляру Аляксею Грышыну, рабочай Ірыне Макарэвіч, электрагазазваршчыку Мікалаю Гаравікову, тынкоўшчыцы Людміле Семеж, вадзіцелю Андрэю Гірусаву, загадчыцы інтэрнатаў Ніне Уласевіч, слесарам Анатолю Дранёву і Аркадзю Прыгару, рабочаму Андрэю Ракаўцу, вядучаму інжынеру па ахове працы Юрыю Былінскаму, эканамісту Таццяне Ачыновіч.

Не пашкадавала добрых слоў для камунальнікаў раёна і першы намеснік старшыні райвыканкама Алена Булатоўская: “Ваш дзень пачынаецца задоўга да таго, як мы ідзём на работу, і заканчваецца пазней за наш. Вашу працу мы бачым і адчуваем і на вуліцы, і ў пад’ездзе, і ў кватэрах, і на сваім рабочым месцы. Менавіта вы робіце шмат для таго, каб наш Глуск быў прыгожы, чысты, утульны і зручны для пражывання”. Ад сябе асабіста і ад раённага выканаўчага камітэта Алена Булатоўская падзякавала камунальнікам за іх працу, пажадала здароўя, поспехаў і ўсіх даброт. Падзячныя пісьмы Глускага раённага выканаўчага камітэта яна ўручыла слесару Сяргею Гарбульку і вадзіцелю Анатолю Акулічу.

Пасля гэтага канцэрт прадоўжыўся новымі порцыямі гумару, песень, танцаў (танцы — падарунак камунальнікам ад узорнага харэаграфічнага ансамбля “Вясёлка” дзіцячай школы мастацтваў). Я не першы раз на такім сходзе і, здавалася, ведаю творчы патэнцыял мясцовых камунальнікаў, але ўсё ж яны здолелі здзівіць, парадаваць і стварыць настрой — сабе, гасцям і запрошаным на свята ветэранам. Дарэчы, у размове з карэспандэнтам газеты яны прасілі ад сябе асобна падзякаваць кіраўніцтву і былым калегам за ўвагу да іх, памяць і, вядома ж, за гэты цудоўны канцэрт, што я з задавальненнем і  раблю. Бо як не падзякаваць за тое, што гэтага варта?! І як не назваць тых, хто гэтага заслужыў?! Гэта Ала Анцюшэня, Юлія Братчэня, Аляксандр Грамыка, Сяргей Акушка, Алена Гнатоўская, Васіль Саўчук, Віялета Жорава, Галіна Гарохава, Уладлена Гулевіч, Людміла Пастушонак і Алена Мікуліч.

Таццяна ЛУКАШЭВІЧ

Фота Ганны АЎТУХОВАЙ