Заўтра ў Беларусі пройдзе традыцыйны вясновы рэспубліканскі суботнік. Плануецца, што ў Глускім раёне ў суботніку паўдзельнічае болей за чатыры тысячы чалавек.
У райцэнтры, напрыклад, працягнуцца работы па добраўпарадкаванні зоны адпачынку “Лодачная станцыя”, таксама глушчане навядуць парадак насупраць мемарыяльнага комплексу Воінскай Славы, работнікі некалькіх арганізацый будуць высаджваць дрэвы на вуліцах гарпасёлка, запланавана і шмат іншых работ. На тэрыторыях сельсаветаў удзельнікі суботніка прыкладуць асаблівыя намаганні па прывядзенні ў парадак пасля зімы помнікаў і абеліскаў воінам і ахвярам Вялікай Айчыннай вайны — прыбяруць, падфарбуюць, пры неабходнасці падрамантуюць. У вёсках раёна будуць ссякаць і выразаць лішнюю расліннасць (сліўняк і яму падобныя зараснікі) каля пустуючых дамоў.
Для зручнасці бацькоў, у якіх ёсць малыя дзеці, 20 красавіка будуць працаваць дзіцячыя садкі.
Мяркуецца, што жыхары раёна заробяць падчас суботніка 9 100 рублёў, яны будуць пералічаны ў аблвыканкам. Палова з усіх сабраных сродкаў застанецца ў рэгіёне, астатнія 50 працэнтаў будуць накіраваны ў Міністэрства фінансаў і пойдуць на капітальны рамонт манумента Перамогі ў Мінску.
Дарэчы, на мінулагоднім рэспубліканскім суботніку па ўсёй краіне было зароблена больш за 8 мільёнаў рублёў, яны былі патрачаны, акрамя іншага, на закупку абсталявання для гарадской бальніцы хуткай медыцынскай дапамогі ў Мінску напярэдадні II Еўрапейскіх гульняў 2019 года.
